სახალხო დამცველი პარლამენტის მიერ მიღებულ დოკუმენტს აკრიტიკებს

პოლიტიკა - 13:08, 08 Jul, 2016

1233

სახალხო დამცველი პარლამენტის მიერ მიღებულ დოკუმენტს აკრიტიკებს. უჩა ნანუაშვილმა დღეს ჟურნალისტებს მის მიერ ანგარიშში შესული რეკომენდაციები გააცნო, რომლებიც პარლამენტმა არ გაითვალისწინა.

უჩა ნანუაშვილმა ყურადღება გაამახვილა რამდენიმე გახმაურებულ და საზოგადოებისთვის ცნობილ საკითხებზე, რომელთა შესახებ მის ანგარიშში იყო საუბარი. ომბუდსმენის თქმით, ამ რეკომენდაციების შესახებ პარლამენტმა არ ასახა საკუთარ დადგენილებაში.

„არ არის ასევე გაზიარებული რეკომენდაციები, რომელიც ეხება სიძულვილით ან შეუწყნარებლობით მოტივირებულ დანაშაულებებზე, გამოძიების პროცესის დასრულებას და ასეთი არაერთი საქმე იყო ბოლო წლების განმავლობაში, ისევე, როგორც არ არის გათვალისწინებული ჩვენი რეკომენდაცია სოფელ ლაფანყურთან, მდინარე ლოპოტას ხეობაში განვითარებული მოვლენების შესახებ, დროებითი საგამოძიებო კომისიის შექმნის თაობაზე“, - განაცხადა უჩა ნანუაშვილმა.

კიდევ რამდენიმე გახმაურებულ საქმეს გამოყოფს სახალხო დამცველი, რომელთა შესახებაც რეკომენდაციები არ მოხვდა პარლამენტის დადგენილებაში და ერთ-ერთი ასეთი საკითხი არის პირადი ცხოვრების ამსახველი კადრები.

„დადგენილებაში არ ასახულა რეკომენდაცია ინტერნეტ სივრცეში გავრცელებული პირადი ცხოვრების ამსახველი კადრების გავრცელების ფაქტებზე, ეფექტიანი გამოძიების წარმართვის უმოკლეს ვადებში დამნაშავე პირთა გამოვლენისა და გამოძიების შედეგების შესახებ საზოგადოების ინფორმირების თაობაზე. ასევე, არ არის დადგენილებაში ნათქვამი ჩვენი რეკომენდაციის შესახებ, რომელიც ეხება საქართველოს სხვადახვა რეგიონში „ერთიანი ნაციონალური მოძრაობის“ პარტიის ოფისებისა და წევრების, მათ შორის პარლამენტარების მიმართ ძალადობის შესახებ ეფექტურ გამოძიებაზე“, - აღნინა უჩა ნანუაშვილმა.

ომბუდსმენი ასევე შეეხო ე.წ. ოდეერების უკანონო საქმიანობასა და ამის შესახებ საზოგადოების ინფორმირებას.