ნატო-ს რიგით 28-ე სამიტი დღეს, ვარშავაში გაიხსნება. ალიანსის ისტორიაში ეს პირველი სამიტია, რომელიც პოლონეთში გაიმართება და რომელსაც გენერალური მდივანი იენს სტოლტენბერგი თავმჯდომარეობს.
როგორც ნატოს ოფიციალურ გვერდზეა აღნიშბული, სამიტში მონაწილეობას 58 ოფიციალური დელეგაცია მიიღებს , მათ შორის 28 წევრი სახელმწიფო და მონტენეგრო, რომლის ალიანსში გაწევრიანება რატიფიცირების პროცესშია. ასევე 26 პარტნიორი ქვეყანა და გაეროს, ევროკავშირის, მსოფლიო ბანკისა ნატოს საპარლამენტო ასამბლეის დელეგაციები.

ვარშავის სამიტს ასევე დაესწრება 2 500-მდე ოფიციალური დელეგატი და მედიის 2 000 წარმომადგენელი.

სამიტს აფასებენ ქართველი ანალიტიკოსები. ექსპერტების განცხადებით, მთავარია საქართველოს თავდაცვიუნარიანობის გაზრდის მექანიზმი იყოს მიღებული.

"ბევრი მექანიზმი არსებობს, რომელიც ალიანს შეუძლია თავდაცვის სფეროში ჩვენ სახელმწიფოს შესთავაზოს, მაგრამ ეს არ იქნება პოლიტიკური გადაწყვეტილება, იმ საფეხურით ამაღლებული, რომლის მოლოდინი ქართველ ხალხს შეიძლება ჰქონოდა. ეს პოლიტიკური გადაწყვეტილება ჩვენ წესით უნდა მიგვეღო, რადგან რეალურად საქართველო აჩვენებდა პროგრესს ბევრი წლის განმავლობაში"- აცხადებს ნინო კალანდაძე.

გია ნოდიას აცხადებს, რომ შეიძლება სამიტიდან თავდაცვის და უსაფრთხოევბის სქემაში დახმარებას უნდა ველოდოთ.

"ნატოს სახელმწიფოების ხელმძღვანელობა მიხვდა, რომ რუსეთი არის რეალური საფრთხე ამიტომ მას სჭირდება აღმოსავლეთ რეგიონის გაძლიერება და საქართველო ამ სისტემაში შედის"- აღნიშნა ექსპერტმა.

მისი თქმით კონკრეტული პროექტები, რომელიც ნატო-საქართველოს თანამშრომლობას გულისხმობს თავდაცვის და უსაფრთხოების დარგში დახმარებას, შეიძლება გაიზარდოს.