ევროპარლამენტის სამოქალაქო თავისუფლებების, მართლმსაჯულებისა და საშინაო საქმეთა კომიტეტმა მხარი დაუჭირა ვიზალიბერალიზაციის შეჩერების მექანიზმის გამარტივებას. ამის შესახებ ინფორმაცია ევროპარლამენტის ოფიციალურ ვებგვერდზე გამოქვეყნდა.

აღნიშნულ საკითხზე მომხსენებელი "ევროპის სახალხო პარტიის" წევრი, ესპანეთის წარმომადგენელი აგუსტინ დიას დე მერა გარსია კონსუერგა იყო.

სამოქალაქო თავისუფლებათა კომიტეტი აღნიშნავს, რომ ე.წ. შეჩერების მექანიზმის გაძლიერების გეგმა საშუალებას მისცემს ევროკავშირს, მესამე ქვეყნების მოქალაქეებისთვის დროებით შეაჩეროს უვიზო რეჟიმი იმ შემთხვევაში, თუ უკანონო მიგრაციისა და თავშესაფრის მიღების დაუსაბუთებელი განაცხადის ზრდა დაფიქსირდება ან მესამე ქვეყანა უარს იტყვის ევროკავშირთან თანამშრომლობაზე რეადმისიის საკითხებში.

ევროპარლამენტის ცნობით, მომავალ კვირას, ე.წ. შეჩერების მექანიზმის სწრაფი შემოღების მიზნით, მოლაპარაკებები ევროკავშირის საბჭოსთან დაიწყება.