სააკაშვილს ,,კანონიერი ქურდის“ დავალებით დაჯავშნული ტოიოტა მოპარეს

პოლიტიკა - 15:25, 07 Jul, 2016

32277

იანუკოვიჩის მინისტრთა კაბინეტის წევრი, იუსტიციის ყოფილი მინისტრი ელენა ლუკაში ფეისბუკზე მიხეილ სააკაშვილის ავტომობილის შესახებ წერს. ლუკაშის თქმით ოდესის გუბერნატორს კიევში ძვირადღირებული, დაჯავშნული ავტომობილი მოპარეს:

„სააკაშვილს პოლიციის ერთი წლისთავი მიულოცეს. დღეს კიევში მას დაჯავშნული Toyota Land Cruiser მოპარეს, რომლის ღირებულებაც დაახლოებით 6 მილიონი გრივნაა.
გილოცავ მიხო!
შესანიშნავი რეფორმაა! მივესალმები თანამემემულე -რეფორმატორებს“- წერს ლუკაში.

ინფორმაცია სააკაშვილისთვის ავტომობილის მოპარვის სესახებ რამდენიმე უკრაინულ საიტზეც გამოჩნდა, როგორც strana.ua უკრაინის გენპროკურატურასთან დაკავშირებულ წყაროზე დაყრდნობით წერს, ოდესის გუბერნატორის ავტომობილის მოპარვა კრიმინალური დაჯგუფების მიერ მოხდა, რომელსაც ე.წ კანონიერი ქურდი „გუგა“, იგივე სერგო ღლონტი ხელმძღვანელობს, რომელიც ამჟამად პატიმრობაში იმყოფება და საქართველოში ექსტრადირებას ელოდება. strana.ua-ს ცნობით თუ უკრაინელი სამართალდამცავები მხედველობაში მიიღებენ ღლონტის სააპელაციო საჩივარს, მის მიმართ ლოიალობას გამოიჩენენ და საქართველოში ექსტრადირებას არ მოახდენენ, ე.წ კანონიერი ქურდი ავტომობილს დააბრუნებს.

ამავე გამოცემის ინფორმაციით, მიხეილ სააკაშვილი მუდმივად ცდილობდა აღნიშნული ძვირადღირებული მანქანა საზოგადოების ყურადღების ცენტრში არ მოხვედრილიყო და როდესაც ხალხს ხვდებოდა გზის ნაწილს დაჯავშნული ავტომობილით გადიოდა, ხოლო დანიშნულების ადგილამდე ნაკლებძვირიანი ავტომობილით მიდიოდა.