გეგეშიძეს უშვებენ? - ელჩი კერის ვიზიტის ფარგლებში გამართულ შეხვედრებს არ ესწრება

პოლიტიკა - 18:34, 06 Jul, 2016

2878

აშშ-ში საქართველოს ელჩი არჩილ გეგეშიძე ამერიკის შეერთებული შტატების სახელმწიფო მდივნის, ჯონ კერის ვიზიტის ფარგლებში თბილისში გამართულ შეხვედრებს არ ესწრებოდა.
ჟურნალისტები დაინტერესდნენ მიზეზით და ამის შესახებ საგარეო საქმეთა მინისტრის მოადგილეს დავით ზალკალიანს ჰკითხეს.
ზალკალიანმა მხოლოდ ის აღნიშნა, რომ გეგეშიძისგან მის მიერ გაკეთებულ განცხადებასთან დაკავშირებით ახსნა-განმარტებას მოისმენენ.
" ჩვენც გვაინტერესებს თუ რამდენად შეესაბამება რეალობას ის განცხადებები, რომლებიც გაჟღერდა, ამიტომ ჯერჯერობით რაიმე ნაჩქარევი გადაწყვეტილების მიღება, სანამ ელჩის მხრიდან სრული სურათი არ გვეცოდინება, თუ რასთან გვაქვს საქმე - ეს არის მისი განცხადება თუ ჟურნალისტის ინტერპრეტაცია, არ მგონია სწორი იყოს” - განაცხადა ზალკალიანმა.

საგარეო საქმეთა სამინისტრომ აშშ-ში საქართველოს ელჩი არჩილ გეგეშიძე მის მიერ გაკეთებული განცხადების გამო თბილისში გამოიძახა. გეგეშიძე თბილისში გამთენიისას ჩამოვიდა, თუმცა აეროპორტში ჟურნალისტებთან კომენტარის გაკეთება არ ისურვა.

საქართველოს თავდაცვის მინისტრი გაკვირვებულია აშშ-ში საქართველოს ელჩის განცხადებით. მეტიც, მინისტრი ამბობს, რომ არცერთი ქართველი ელჩი მსგავს განცხადებებს არ უნდა აკეთებდეს.

მინისტრის თქმით, გაუხარდა, როცა გაიგო, რომ ელჩი თბილისში საგარეო საქმთა სამინისტროში განმარტებებისთვის დაიბარეს.

"მე გამიხარდა ის, რომ სამინისტროში დაიბარეს. არა მგონია, რომ ზოგადად რომელიმე საქართველოს ელჩი უნდა აკეთებდეს ასეთ განცხადებას და მითუმეტეს აშშ-ში საქართველოს ელჩი. იმედი მაქვს, რომ ეს კონტექსტიდან ამოგლეჯილი ფრაზაა და ის ამას განმარტავს," - აცხადებს თავდაცვის მინისტრი, თინა ხიდაშელი.