4 წლის განმავლობაში ვერ გამოვიყენეთ ის პოზიტიური პოტენციალი, რაც აშშ-სთან ურთიერთობაში გვაქვს- ხოშტარია

პოლიტიკა - 14:46, 06 Jul, 2016

1880

ერთიანი ნაციონალური მოძრაობის წევრი ელენე ხოშტარია აშშ-ის სახელმწიფო მდივნის საქართველოში ვიზიტს მნიშვნელოვნად აფასებს. ხოშტარიას თქმით საქართველოს ხელისუფლებამ არასათანადოდ გამოიყენა ის შესაძლებლობები, რომლებიც ქვეყანას საშუალებას მისცემდა უფრო მეტად გაეღრმავებინა აშშ-სთან ურთიერთობა:

„სამწუხაროდ, ჩვენი დიპლომატიური ძალისხმევა იყო მიმართული არა კონკრეტული შედეგების მიღწევაზე, არამედ ოპოზიციის დისკრედიტაციაზე. ჩვენ დიდი რესურსი დავხარჯეთ იმაზე, რომ მათ კრიტიკას ვპასუხობდით არადიპლომატიურად. იგივე ძალიან მნიშვნელოვანი იყო, როდესაც რუსთავი 2-ის გამო ჩვენ ამერიკა გვესაუბრება, რომ ქვეყანამ შეიძლება ქვეყანამ რაღაცა ფასი გადაიხადოს. სამწუხაროდ, ჩვენ ოთხი წლის განმავლობაში ვერ გამოვიყენეთ ის პოზიტიური პოტენციალი, რომელიც ამერიკასთან ურთიერთობაში გვაქვს. თუმცა, ჩვენს გუნდს აქვს ძალიან მკაფიო ხედვა იმისა, თუ როგორ მივაღწიოთ კონკრეტულ შედეგს ყველა ამ მიმართულებით. იქნება ეს ნატოში ინტეგრაციის მიმართულება თუ თავისუფალი ვაჭრობის მიღწევა. ჩვენ ფაქტობრივად გამზადებული დავახვედრეთ გადაწყვეტილებები და ამას სჭირდებოდა მწყობრი საგარეო პოლიტიკა. ჩვენ ახლა გვაქვს კონკრეტული ხედვა, როგორ უნდა დავდოთ შედეგები,“- განაცხადა ელენე ხოშტარიამ.

ელენე ხოშტარიას თქმით, საარჩევნო გარემო და მედიაპლურალიზმი ჯონ კერის შეხვედრების მნიშვნელოვანი თემები იქნება და საქართველოს ხელისუფლებას მოუწევს აშშ-დან წამოსულ კითხვებზე პასუხის გაცემა. ხოშტარიას თქმით აღნიშნულ თემებზე საუბარს თავად ენმ-ც აპირებს, როდესაც ჯონ კერი ოპოზიციის წარმომადგენლებს შეხვდება. ამასთანავე საუბრის ერთ-ერთი თემა უსაფრთხოების საკითხში აშშ-ის მხარდაჭერაც იქნება.