"ყველას მკაცრად მოთხოვეთ პასუხი, თორემ მოგეთხოვებათ უშუალოდ ჩემგან"- ნარმანია სამუშაოების დროულად შესრულებას ითხოვს

პოლიტიკა - 12:19, 06 Jul, 2016

2574

თბილისის მერი ქალაქში სერვისების მიმწოდებელი კომპანიებისაგან სხვადახვა სახის ინფრასტრუქტურის დაზიანების შემთხვევაში სამუშაოების დროულ და ხარისხიან შესრულებას ითხოვს. ამის შესახებ განცხადება დავით ნარმანიამ დღეს თბილისის მერიაში მთავრობის სხდომის დაწყებისას გააკეთა.

თბილისის მერის დავით ნარმანიას თქმით, მიუხედავად იმისა, რომ ინტენსიურად მუშაობს ქალაქი სხვადასხვა უბანში, მაინც ბევრია ისეთი ადგილები, სადაც პერიოდულად სხვადასხვა სახის ინფრასტრუქტურა ზიანდება და მწყობრიდან გამოდის.

„ეს ეხება არა მხოლოდ ჩვენ ქვემდებარე ინფრასტურუქტურას, არამედ სხვა ობიექტებს, რომლებიც რიგ შემთხვევაში კერძო ოპერატორების მართვის ქვეშ არის. მიუხედავად ამისა, მონიტორინგი ჩვენ კიდევ უფრო უნდა გავაძლიეროთ, კიდევ უფრო ინტენსიურ რეჟიმში მივცეთ მითითებები როგორც თბილისის მერიის ქვემდებარე სამუშაოების შემსრულებელ კომპანიებს, ასევე იმ კერძო კომპანიებს, რომლებსაც ესა თუ ის სერვისი აქვს დელეგირებული და ამ სერვისის მოწოდებას ახდენენ. დაზიანების შემთხვევაში დროულად და ოპერატიულად მოახდინონ რეაგირება. ამიტომ ყველას მკაცრად მოთხოვეთ პასუხი, თორემ მოგეთხოვებათ უშუალოდ ჩემგან და სფეროს კურატორი მოადგილეებისაგან, რომ ყველაფერი დროულად იყოს მოწესრიგებული და ჩვენი ქალაქი იყოს უფრო მეტად კეთილმოწყობილი, უფრო მეტად ლამაზი და მიმზიდველი“, - მიმართა თბილისის მერმა დედაქალაქის მთავრობის წევრებს.