,,სატელიტ ენჯეოშნიკებზე პასუხს არ ვაპირებ“ - სესიაშვილი პროკურატურაში მისვლას არ აპირებს

პოლიტიკა - 17:50, 05 Jul, 2016

1954

თავდაცვისა და უშიშროების კომიტეტის თავმჯდომარე პროკურატურაში მისვლას არ აპირებს. საქმე ეხება "სამართალდამცავთა რეფორმირების ცენტრის" ხელმძღვანელის განცხადებას, რომელმაც ირაკლი სესიაშვილის მიერ შაბათის კურიერში აჰმედ ჩატაევის შესახებ გაკეთებული განცხადების გამო საგამოძიებო უწყებას გამოძიების დაწყების მოთხოვნით მიმართა.

როგორც "ნიუპოსტს" სესიაშვილმა განუცხადა, "სატელიტმა ენჯეოშნიკებმა სარჩელის შეტანამდე მის განცხადებებს კარგად უნდა მოუსმინონ".

"როდესაც მე ეს განცხადება გავაკეთე, იქვე ხაზი გაუსვი იმ გარემოებას, რომ ჩატაევი არის ტერორისტი და მისი გაშიფვრა არანაირ საფრთხეს არ წარმოადგენს. თავის დროზე ბინ ლადენიც თანამშრომლობდა აშშ-სთან და შემდეგ ტერორისტად გარდაიქმნა და ამაზე ღიად ისაუბრა შეერთებულმა შტატებმა. ტერორისტებს უნდა ვებრძოლოთ და აგენტობის გამო არ უნდა დავიცვათ ისინი. ამიტომ, სანამ ვინმე შეეცდება, ვითომ სახელმწიფო ინტერესების შემცველი ინფორმაციის დაცულობისკენ მომიწოდოს, სჯობს კანონმდებლობაში და სიტუაციაში გაერკვეს"- აღნიშნა სესიაშვილმა.

მისი თქმით, "სააკაშვილის პოლიტიკური გუნდის მოტივი, რომ ათათურქის აეროპორტში განხორციელებული ტერაქტი რამენაირად დაეკავშირებინათ საქართველოს ხელისუფლებისთვის, ბუმერანგივით მოუბრუნდათ მათ.

"ისინი ამ სიმართლის გამო არიან გამწარებულნი და მათი სატელიტი, ზონდერ ენჯეოშნიკები მიჩივიან, ყოველგვარი საფუძველის გარეშე"- თქვა უმრავლესობის წევრმა.

სესიაშვილის განცხადებით სწორედ ამ მიზეზით ის პროკურატურაში მისვლას არ აპირებს.

"დიდ პატივს ვცემ პროკურატურას, თუმცა ნაციონალური მოძრაობის პოლიტიკური ინტერესების მატარებელ განცხადებაზე არ ვაპირებ დამატებითი განცხადების გაკეთებას, მივალ მხოლოდ მაშინ თუ ამას სასამართლო გადაწყვეტს, რომ გამომკითხოს"- დასძინა ირაკლი სესიაშვილმა.

სკანდალური განცხადება დეპუტატმა კურიერის პირდაპირ ეთერში გააკეთა.

„ახმედ ჩატაევი წინა ხელისუფლების უშიშროების აგენტი იყო და ის სააკაშვილისგან გიორგი ლორთქიფანიძის მეშვეობით იღებდა დავალებებს. მას ჰქონდა საქართველოს მოქალაქის ოპერატიული პასპორტი და ჩვენი უშიშროების დავალებებით სხვადასხვა ქვეყნებში მოქმედებდა,“ - განაცხადა ირაკლი სესიაშვილმა.