ვიხილავთ თუ არა ახალ პროდასავლურ ბლოკს 2016 წლის პარლამენტის არჩევნებზე

პოლიტიკა - 14:03, 05 Jul, 2016

1529

ვიხილავთ თუ არა 2016 წლის საპარლამენტო არჩევნებზე ახალ, პროდასავლურ პოლიტიკურ ბლოკს. როგორც ჩანს პარტია „ახალი საქართველოს“ ლიდერი გიორგი ვაშაძე აქტიურ მოლაპარაკებებს მართავს ყველა იმ პარტიასთან, რომელთა საგარეო პრიორიტეტი ქვეყნის დასავლურ სტრუქტურებში ინტეგრირებაა.

მას შემდეგ, რაც გიორგი ვაშაძემ „ნაციონალური მოძრაობა“ დატოვა, ის პირველივე დღიდან აცხადებდა, რომ მისი მთავარი პრიორიტეტი ქვეყნის ევრიოპულ სტუქტურებში გაწევრიანება იყო. ამიტომ არავის გაკვირვებია ვაშაძის გადაწყვეტილება, არჩევნებზე ფსონი სწორედ პროდასავლურ ძალებზე დადოს.

არსებული ინფორმაციით, ვაშაძესთან ბლოკში ვიხილავთ „ახალ პოლიტიკურ ცენტრ - გირჩს“, რომელიც ამ უკანასკნელის მსგავსად, ცოტა ხნის წინ გამოეყო ,,ნაციონალურ მოძრაობას".

"ნიუპოსტი" თემის გადამოწმებას "ახალი საქართველოს“ ლიდერთან გიორგი ვაშაძესთან შეეცადა.

ვაშაძემ ყოფილ თანაპარტიელებთან მოლაპარაკებები დაადასტურა, თუმცა იქვე აღნიშნა, რომ მისი პარტია მოლაპარაკებებს ყველა დასავლური ღირებულებების მქონე პარტიებთანაც აწარმოებს - როგორც საპარლამენტო ასევე არასაპარლამენტო ოპოზიციაში.

"პროდასავლურ ძალებთან ნამდვილად მიმდინარეობს მოლაპარაკებები, ძალიან ბევრ პოლიტიკურ პარტიასთან ვსაუბრობთ, რომ დასავლურ ფლანგზე შეიძლება იყოს გარკვეული ბლოკი, რომელიც ერთობლივად მიიღებს არჩევნებში მონაწილეობას. ამ პარტიებს აქვთ ჩამოყალიბებული პოზიცია საგარეო ვექტორთან დაკავშირებით“- აღნიშნა ვაშაძემ.

რაც შეეხება „გირჩთან“ მოლაპარაკებებს, გიორგი ვაშაძემ „ნიუპოსტს“ განუცხადა, რომ „მოლაპარაკებები მიმდინარეობს, ახლო მომავალში გაირკვევა ვისთავ ვითანამშრომლებთ. ზოგადად ახალი პოლიტიკური კლასი ძალიან სჭირდება ჩვენ ქვეყანას“- უთხრა „ნიუპოსტს“ ვაშაძემ.

კითხვაზე, აწარმოებს თუ არა ვაშაძე მშობლიურ პარტიასთან ან პარტიის კონკრეტულ პირებთან მოლაპარაკებას „ახალი საქართველოს“ ლიდერმა ამ კითხვაზე საპასუხოდ განაცხადა რომ ენმ-სთან მოლაპარაკებები არ გამართულა.

„ჩვენ მათთან კომუნიკაცია ჯერ-ჯერობით არ გვაქვს“- განმარტა ვაშაძემ.