პარლამენტის წევრი დიმიტრი ხუნდაძე მაკედონიელ კოლეგას შეხვდა

პოლიტიკა - 19:03, 04 Jul, 2016

524

ეუთოს საპარლამენტო ასამბლეის ყოველწლიური სესიის პარალელურად, რომელიც 1-5 ივლისს თბილისში მიმდინარეობს, სხვადსხვა ქვეყნის კანონმდებლები ორმხრივ შეხვედრებს მართავენ.

პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარედიმიტრი ხუნდაძე მაკედონიის რესპუბლიკის ასამბლეის ჯანდაცვისა და ეთნიკურ საკითხთა კომიტეტის თავმჯდომარეს ვლადიმირ გიორჩევს შეხვდა. ორი ქვეყანის ჯანდაცვის სისტემების განხილოვასთან ერთად, შეხვედრის უმთავრესი ნაწილი ქვეყნებში დემოგრაფიული პოლიტიკის განხორციელების პრიორიტეტებს დაეთმო.

„მაკედონიელ კოლეგასთან შეხვედრისას ჯანდაცვისა და სოციალური თემატიკის გარდა დემოგრაფიული პოლიტიკის მიმართულებები მიმოვიხილეთ. ისევე როგორც საქართველოში, მაკედონიის რესპუბლიკაშიც ჯანმრთელობის დაცვისა და სოციალურ საკითხთა კომიტეტი მეთვალყურეობას უწევს დემოგრაფიული განვითარების საკიტხებს. მაკედონიელ სტუმარს საქართველოს მიერ განხორციელებული ცვლილებები და პარლამენტის მიერ მიღებული „სახელმწიფო დემოგრაფიული უსაფრთხოების“ დოკუმენტი გავაცანი და მის შესახებ ვისაუბრეთ. როგორც აღინიშნა, მაკედონიაშიც დემოგრაფიის კუთხით ანალოგიური პრობლემებია და ის შედეგები, რაც საქართველოში გატარებულმა ღონისძიებებმა მოიტანა მაკედონიისთვის საინტერესო და მნიშვნელოვანია“, - განაცხადა დიმიტრი ხუნდაძემ შეხვედრის დასრულების შემდეგ.

ქართველი და მაკედონიელი კოლეგები შემდგომი თანამშრომლობის მიმართულებებზე და აქტიური კომუნიკაციის საკითხებზე შეთანხმდნენ. ვლადიმირ გიორჩევმა, რომელიც ეუთოს საპარლამენტო ასამბლეაში მაკედონიის დელეგაციის წევრს წარმოადგენს, შეხვედრები პრემიერ-მინისტრთან და შრომის, ჯანმრთელობისა და სოციალურ საკითხთა მინისტრთანაც გამართა.