დავით უსუფაშვილი უკრაინის მსოფლიო კონგრესის პრეზიდენტს შეხვდა

პოლიტიკა - 19:00, 04 Jul, 2016

942

საქართველოს პარლამენტის თავმჯდომარე, დავით უსუფაშვილი უკრაინის მსოფლიო კონგრესის პრეზიდენტს, იუჟინ ჩოლის შეხვდა. მხარეებმა საქართველოსა და უკრაინის ურთიერთობაზე, უკრაინაში შექმნილ კრიზისსა და ორ ქვეყანაში რუსეთის ფედერაციის ქმედებებზე ისაუბრეს.

„ჩვენს წინაშე მდგარი გამოწვევაა, დავარწმუნოთ საერთაშორისო საზოგადოება, რომ ის, რაც უკრაინაში ხდება, ქვეყნის საშინაო პრობლემა არ არის, როგორც ამას რუსეთის ფედერაცია ამბობს. ეს არ არის მხოლოდ უკრაინა-რუსეთის საკითხი, ეს საერთაშორისო საკითხია. პრეზიდენტი პუტინი გამოწვევას უგზავნის დემოკრატიას, საერთაშორისო საზოგადოებას. ეს დაიწყო საქართველოში, გრძელდება უკრაინაში და თუ პრეზიდენტი პუტინი არ შეაჩერეს უკრაინაში, ის უფრო შორს წავა და საერთაშორისო საზოგადოება ადამიანურ და ფინანსურ დანაკარგს განიცდის. საქართველოს პარლამენტის თავმჯდომარესთან ვისაუბრეთ, როგორ მივაწოდოთ ეს გზავნილი საერთაშორისო საზოგადოებას“,- აღნიშნა შეხვედრის დასრულების შემდეგ იუჟინ ჩოლიმ.

საქართველოს პარლამენტის თავმჯდომარის განცხადებით, შეხვედრაზე ორ ქვეყანას შორის ურთიერთობების გაღრმავებაზე ისაუბრეს, განსაკუთრებით, იმ ვითარებაში, როცა საქართველოსა და უკრაინას მეგობრობასთან ერთად, პრობლემებიც აერთიანებთ.

„საუბარი გვქონდა იმაზე, თუ როგორ შეიძლება საქართველომ და უკრაინამ მეტი მეტი გავაკეთოთ ერთმანეთის დასახმარებლად იმ ვითარებაში, როდესაც გვაერთიანებს არა მხოლოდ მეგობრული ურთიერთობა, არამედ, საერთო პრობლემები. საინტერესო იდეებიც განვიხილეთ, მათ შორის ის, თუ როგორ შეიძლება გავზარდოთ იმ ადამიანების ინფორმირებულობა, ვინც ხანდახან უცხოეთში, თავიანთ ქვეყანებში საკუთარი პრობლემებით არიან მოცულნი და ზოგჯერ უკანა პლანზე გადაიწევს ხოლმე სხვა ქვეყნების პრობლემები. და კიდევ ის , რომ ჩვენ ერთად, ქართველებმა და უკრაინელებმა მსოფლიოს უნდა დავანახოთ, რომ ჩვენ მსოფლიოს არ ვთხოვთ დახმარებას ჩვენთვის, ჩვენ მსოფლიოს ვთხოვთ, რომ საქართველოს და უკრაინის დახმარებით უზრუნველყონ საკუთარი უსაფრთხოება და მომავალი. საერთაშორისო წესრიგის დამრღვევი, საერთაშორისო სამართლის ფუძემდებლური პრინციპების საწინააღმდეგოდ მოქმედი ქვეყანა საბოლოო ჯამში ყველას დააზარალებს. ამაზე, ცხადია, ჩვენ გვაქვს ურთიერთგაგება და გავაგრძელებთ თანამშრომლობას“,- განაცხადა ჟურნალისტებთან საუბრისას დავით უსუფაშვილმა