3-6 ივლისს ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე ეკა ბესელია ლონდონში, დიდი ბრიტანეთის პარლამენტში, ადამიანის უფლებათა დაცვის კომიტეტში ორგანიზებულ საერთაშორისო ფორუმში მიიღებს მონაწილებას და მოხსენებით გამოვა. იგი საქართველოს ადამიანის უფლებათა დაცვის კომიტეტის მიღწევებსა და სიახლეებზე პრეზენტაციას წარადგენს. ღონისძიება ვესტმისტერის დემოკრატიული ფონდის მიერ არის ორგანიზებული.

ადამიანის უფლებებისა და პარლამენტარიზმის საკითხებში ვესტმისტერის საერთაშორისო ექსპერტებმა შეაფასეს საქართველოს, ხორვატიის, მაკედონიის და სხვა ქვეყნების პარლამენტების ადამიანის უფლებათა კომიტეტების საქმიანობა და წარუდგინეს კონკრეტული რეკომენდაციები.

საქართველოს პარლამენტის ადამიანის უფლებათა კომიტეტის ინფორმაციიით მათ წარმატებით შეასრულეს ყველა ეს რეკომენდაცია და მას სხვა ქვეყნებს შორის ყველაზე დიდი მიღწევები აქვს. საქართველო შეაფასეს როგორც ყველაზე წარმატებული ქვეყანა, რომელმაც აღნიშნული რეკომენდაციები შეასრულა.

საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარე თავისი მოხსენებით გამოცდილებას გაუზიარებს სხვა ქვეყნების წარმომადგენლებს, კერძოდ, ისაუბრებს თუ რა სიახლეები დანერგა ადამიანის უფლებათა კომიტეტმა და როგორ შეძლო ეს. კომიტეტის მიერ დანერგილი ახალი ფორმატები კი ადამიანის უფლებების დაცვის საერთაშორისო სტანდარტების იმპლემენტაციაზე საპარლამენტო კონტროლის გაძლიერებას გულისხმობს.

ვესმისტერის დემოკრატიული ფონდის ორგანიზებულ ღონისძიებას ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის პირველი მოადგილე გედევან ფოფხაძე და კომიტეტის წევრი მერაბ კაჭახიძეც დაესწრება.