ეუთოს საპარლამენტო ასამბლეის დემოკრატიის,ადამიანის უფლებების და ჰუმანიტარულ საკითხთა საერთო კომიტეტის სხდომა გაიმართა

პოლიტიკა - 16:53, 04 Jul, 2016

1169

ეუთოს საპარლამენტო ასამბლეის დემოკრატიის, ადამიანის უფლებების და ჰუმანიტარულ საკითხთა საერთო კომიტეტის მეოთხე სხდომა რეზოლუციის პროექტების განხილვას დაეთმო. სხდომაზე დელეგატების მიერ ხუთი რეზოლუციის პროექტი იყო წამოდგენილი.

ამერიკელი დელეგატის, ბენჯამენ კარდინის მიერ წარმოდგენილი იყო რეზოლუციის პროექტი ეუთოსადმი ძალადობასა და დისკრიმინაციასთან ბრძოლის შესახებ მოწოდების თაობაზე, რომელშიც ეუთოს წევრი სახელმწიფოების მიერ საერთო გეგმის შემუშავებისა და ინიციატივების მხარდაჭერის აუცილებლობა და მნიშვნელობაა ხაზგასმული.

კომიტეტის სხდომაზე ამერიკელმა დელეგატმა კრისტოფერ სმიტმა კომიტეტის წინაშე წარადგინა პროექტი წარსულში სექსუალური სახის დანაშაულისთვის მსჯავრდებული პირების მიერ, ბავშვთა სექსუალური ექსპლუატაციისა და ბავშვებით ვაჭრობის აღკვეთის თაობაზე. მისი განცხადებით, ბავშვთა მიმართ ჩადენილი სექსუალური ხასიათის დანაშაულის სტატისტიკა მზარდია და წევრი სახელმწიფოების მიერ საჭიროა რეაგირების მკაფიო და მყარი პოლიტიკის შემუშავება ამ მიმართულებით.

დემოკრატიის, ადამიანის უფლებებისა და ჰუმანიტარულ საკითხთა კომიტეტის წევრებმა მოისმინეს ჩეხი, ივანა დობეშოვას მიგრაციის, როგორც უსაფრთხოების კომპლექსული გამოწვევის შესახებ მოხსენება და იმსჯელეს ფრანგი დეპუტატის, მიშელ ვუაზენის მიერ წარმოდგენილ პროექტზე, რომელიც ლტოლვილთა უფლებებს შეეხებოდა.

კანადელმა დეპუტატმა, ჰიდა ფრაიმ კოლეგებს რეზოლუციის პროექტი გააცნო, რომელშიც წარმოდგენილი იყო ანალიზი მიგრანტებისა და ლტოლვილების მდგომარეობაზე გენდერული პრობლემატიკის ჭრილში.

რეზოლუციის პროექტების განხილვა დებატების ფორმატში წარიმართა და პროექტის თითოეულ პუნქტის მომხრე და საწინააღმდეგო განცხადებები გაკეთდა. რეგლამენტის შესაბამისად განხილულ პუნქტებზე კენჭისყრის პროცედურები გაიმართა. დეპუტატებმა დამატებით პუნქტებთან დაკავშირებით შესწორებები წარმოადგინეს, რომელთა მხოლოდ ნაწილი იქნა გათვალისწინებული და კომიტეტმა კენჭისყრის შედეგად რეზოლუციის ხუთივე პროექტი მიიღო.

დღესვე, კომიტეტის წევრებმა პასუხისმგებელი პირები ფარული კენჭისყრით, ერთი წლის ვადით აირჩიეს.

დემოკრატიის, ადამიანის უფლებებისა და ჰუმანიტარული საკითხების კომიტეტს თავმჯდომარის რანგში, ერთი წლის განმავლობაში ესპანეთის დელეგაციის წარმომადგენელი, იგნარო სანჩესი უხელმძღვანელებს. თავმჯდომარის მოადგილის პოზიციაზე კოლეგებმა ჩეხ ივანა დობეშოვას, ძირითად მომხსენებლად კი კვიპროსის დელეგაციის წარმომადგენელს, ადიან კირიაკოსს დაუჭირეს მხარი.

კომიტეტზე მიღებული დოკუმენტები ეუთოს საპარლამენტო ასამბლეის პლენარულ სხდომას გადაეგზავნება.