ქართული დელეგაციის მიერ მომზადებულ ცვლილებების პროექტს ეუთოს საპარლამენტო ასამბლეის კომიტეტმა მხარი დაუჭირა

პოლიტიკა - 15:30, 03 Jul, 2016

1415

ეუთოს საპარლამენტო ასამბლეის პოლიტიკისა და უსაფრთხოების საერთო კომიტეტის სხდომაზე საქართველოს საპარლამენტო დელეგაციის მიერ მომზადებულ ცვლილებების პროექტს მხარი დაუჭირეს. 87 პუნქტიან რეზოლუციის პროექტში საქართველოს მხარემ 4 ცვლილება წარმოადგინა, რომლითაც

საპარლამენტო ასამბლეა რუსეთის ფედერაციას დაბეჯითებით მოუწოდებს სრულად შეასრულოს 2008 წლის 12 აგვისტოს ხელმოწერილი ექვსპუნქტიანი შეთანხმება;

საპარლამენტო ასამბლეა მოუწოდებს რუსეთის ფედერაციას უზრუნველყოს ჰუმანიტარული ტვირთის თავისუფლად გადაადგილების ხელშეწყობა აფხაზეთში/საქართველო და ცხინვალის რეგიონში/საქართველო;

ხაზს უსვამს საქართველოს კონფლიქტების მშვიდობიანად მოგვარების პროცესში ეუთოს როლის გაძლიერებას, მათ შორის ჟენევის საერთაშორისო დისკუსიის ფორმატში;

სთავაზობს მონაწილე სახელმწიფოებს გააქტიურონ საერთაშორისო დიალოგის მექანიზმები საერთაშორისო უსაფრთხოებისა და სტაბილურობისთვის აფხაზეთში/საქართველო და ცხინვალის რეგიონში/საქართველო.

ქართული დელეგაციის მიერ მომზადებულ ცვლილებებს კომიტეტმა მხარი რიგით მესამე სხდომაზე უყარა. დილის სხდომა კი რეზოლუციის პროექტზე მუშაობით დაიწყო.

კომიტეტის თავმჯდომარემ როჯერ ვიკერმა კომიტეტის წევრებს სხდომის დასაწყისში განსახილველი საკითხების სიმრავლიდან გამომდინარე, პროცედურების და დროის მკაცრად დაცვისკენ მოუწოდა.

საპარლამენტო დელეგაციის წევრებმა შვედეთის წარმომადგენლის, მარგარიტა სედერფელტისმიერ კომიტეტის პირველ სხდომაზე წარმოდგენილ მოხსენებასთან დაკავშირებით ცვლილებები და შენიშვნები წარმოადგინეს.

რეზოლუციის პროექტის განხილვა დებატების ფორმატში წარიმართა და პროექტის თითოეულ პუნქტის მომხრე და საწინააღმდეგო განცხადებები გაკეთდა. რეგლამენტის შესაბამისად განხილულ პუნქტებზე კენჭისყრის პროცედურები გაიმართა. აღსანიშნავია, რომ რუსეთის ფედერაციის დელეგაციის მიერ მომზადებული ცვლილებები, რომელთა შინაარსიც უკრაინასა და ყირიმში განხორციელებულ მოვლენებს შეეხებოდა, კომიტეტის წევრთა უმრავლესობის მხრიდან არ იქნა გაზიარებული.

რეზოლუციის პროექტის განხილვის დასრულების შემდეგ კომიტეტის მესამე სხდომა დასრულდა.

კომიტეტის მორიგი სხდომა ხვალ 09:00 საათზე გაიმართება, რომელიც დამატებითი ოქმების განხილვას დაეთმობა. ხვალინდელ სხდომაზე ქართული მხარის მიერ მომზადებული დამატებითი პუნქტის „კონფლიქტი საქართველოში“ განხილვა იგეგმება, რომელსაც ქართული დელეგაციის ხელმძღვანელი, პარლამენტის თავმჯდომარე დავით უსუფაშვილი წარადგენს.