აჭარის მთავრობის ყოფილი მეთაური ლევან ვარშალომიძე სამშობლოში დღეს ბრუნდება. ცნობილია, რომ ვარშალომიძე სარფის საბაჟო პუნტის გავლით, ანუ თურქეთიდან 13:00 საათზე შემოვა.

„ჩემი დაბრუნების ერთადერთი მიზანია, რომ წინასაარჩევნო კამპანიაში ჩავერთო. ვაპირებ ჩემს გუნდთან ერთად აჭარაში გამარჯვებას, რათა ბოლო სამ წელიწადნახევარი დაპაუზებული და გაჩერებული ბათუმი და აჭარა ერთხელ და სამუდამოდ ავამოქმედოთ და განვახორციელოთ ყველა ის დიდი პროექტი, რომელიც ჩვენ გვქონდა,“ - განაცხადა ლევან ვარშალომიძემ.

4 წლიანი პაუზის შემდეგ ის ქართულ პოლიტიკას კონკრეტული გეგმით უბრუნდება. ვარშალომიძე აცხადებს, რომ არჩევნებში გამარჯვების შემდეგ აჭარაში მშენებლობის ტემპები ისევ ძველი იქნება, თუმცა დამკვიდრდება მმართველობის ახალი სტილი.

აჭარის მთავრობის ყოფილი მეთაური არ გამორიცხავს, მის წინააღმდეგ არსებული საქმეების გამოძიება მისი საქართველოში დაბრუნების შემდეგ გააქტიურდეს. თუმცა, ვარშალომიძე ამბობს, რომ ის ბრძოლას ხელისუფლების არჩევნების გზით შესაცვლელად მაინც აპირებს.