ხმაურიაინი გამოდგა თბილისში მიმდინარე ეუთოს პოლიტიკის კომიტეტის სხდომა. უკრაინის დელეგაციის წევრები შვეიცარიის ინიციატივას დაუპირისპირდნენ. დელეგაცის წევრები რუსი დეპუტატებისთვის ევროკავშირში გადაადგილებაზე სანქციების მოხსნის ინიციატივას აპროტესტებენ.

ანტონ გერაშენკოს განცხადებით, აღნიშნული ცვლილების რეზოლუციის პროექტში ჩამატება მიუღებელია, რადგან რუსეთი აგრესორი სახელმწიფოა.

„რუსეთმა უნდა აიღოს პასუხისმგებლობა ყირიმის ოკუპაციაზე, ევროკავშირში შესვლის უფლება რუს დეპუტატებს არ უნდა ჰქონდეთ. შვეიცარიის არგუმენტს, რომ უნდა მივცეთ რუსეთს დიალოგის საშუალება არ ვიზიარებთ. შეგახსენებთ, რომ დუმაში 600 კაცია და რუსეთის დუმის 20 დეპუტატს, რომლებმაც ყირიმის ანექსიას მხარი დაუჭირეს, სანქციები უნდა შეუნარჩუნდეს. ევროკავშირში შესვლის უფლება მათ არ უნდა ჰქონდეთ, რადგან უპრინციპოდ დაარღვიეს საერთაშორისო ნორმები,“ - აცხადებენ უკრაინის დელეგაციის წევრები.

გერაშენკოს განცხადებით, შვეიცარიის წარმომადგენლის, რეზოლუცია, მისი მიღების შემთხვევაში, სარეკომენდაციო ხასიათს ატარებს.

"თუმცა მიუხედავად ამისა, ეს იქნება პლუსი რუსეთისთვის. თუ ეუთო-ს სამიტზე მიიღებენ გადაწყვეტილებას სანქციების მოხსნის რეკომენდაციის შესახებ, ეს იქნება უკრაინის ტერიტორიული მთლიანობისა და დამოუკიდებლობის დაცვის პრინციპებზე უარის თქმა. ამიტომ ჩვენ რუსეთის წინააღმდეგ სანქციების მოხსნის წინააღმდეგი ვართ. ვფიქრობ, რუსეთს შვეიცარიის კონფედერაციის ტერიტორიის ნაწილი რომ დაეპყრო, რუსი დეპუტატების წინააღმდეგ სანქციების მოხსნის სურვილი არ ექნებოდათ“, - განაცხადა გერაშენკომ.