ეუთო-ს საპარლამენტო ასამბლეის 25-ე ყოველწლიური სესია - მხარეები მიმდინარე კონფლიქტებზე მსჯელობენ

პოლიტიკა - 12:37, 02 Jul, 2016

936

თბილისში, საგამოფენო ცენტრ „ექსპო ჯორჯიაში“ ეუთო-ს საპარლამენტო ასამბლეის 25-ე ყოველწლიური სესია გრძელდება.

ევროპის უშიშროებისა და თანამშრომლობის ორგანიზაციის წევრთა წარმომადგენლებმა მიმდინარე კონფლიქტებზე იმსჯელეს.

აფხაზეთისა და ცხინვალის რეგიონის თემის დაყენება რეზოლუციის მიღების ეტაპზე იგეგმება.

ასამბლეაზე საკუთარი რეზოლუცია წარადგინეს სომხეთისა და აზერბაიჯანის, ასევე უკრაინის წარმომადგენლებმა.

ეუთოს საპარლამენტო ასამბლეის პრეზიდენტობის კანდიდატი, გიგი წერეთელი, იმედოვნებს, რომ საქართველოსთვის მნიშვნელოვანი გადაწყვეტილება იქნება დღეს მიღებული.

„იქნება დებატებიც ამ თემებზე. ჩვენ გვაქვს რამდენიმე შესწორება რეზოლუციაში და იმედი მაქვს, რომ მხარდაჭერილი იქნება საქართველოსთვის მნიშვნელოვანი საკითხი,“ - აცხადებს წერეთელი.

ამასთან როგორც საქართველოს პარლამენტის წევრმა გია ვოლსკიმ ჟურნალისტებს განუცხადა, კომიტეტებში რეზოლუციების განხილვა დაიწყო.

„ხვალ ან ზეგ საბოლოო კენჭისყრა იქნება რეზოლუციებზე და შემდეგ ეს ყველაფერი გაერთიანდება ერთ დოკუმენტში, რომელიც იქნება ეუთო-ს საპარლამენტო ასამბლეის 25-ე ყოველწლიური სესიის საერთო დოკუმენტი“, - განაცხადა გია ვოლსკიმ.

თავის მხრივ, საქართველოს პარლამენტის წევრმა, თედო ჯაფარიძემ აღნიშნა, რომ საკომიტეტო მოსმენები ეუთო-ს საპარლამენტო ასამბლეის განუყოფელი ნაწილია.