,არჩევნები ამ დრომდე მიღწეული წარმატების გამოცდაც იქნება“ - პრემიერი რეფორმების დღის წესრიგზე საუბრობს

პოლიტიკა - 18:18, 01 Jul, 2016

857

საქართველოს პრემიერ-მინისტრმა, გიორგი კვირიკაშვილმა ეუთოს ასამბლეის ფარგლებში განაცხადა, რომ მთავრობას სჯერა, შიდა ეკონომიკური განვითარება ინვესტიციების მოზიდვის გარეშე წარმოუდგენელია და, ამდენად, ხელისუფლებამ შეიმუშავა 4-პუნქტიანი რეფორმების დღის წესრიგი, რომელიც მოწოდებულია, უზრუნველყოს მდგრადი განვითარება და ინკლუზიური ზრდა.

მთავრობის მეთაურის განმარტებით, რეფორმების მიმდინარე პროცესი ასევე შეეხება საგადასახადო სისტემასა და კაპიტალის ბაზრებს, განათლებას, ჯანდაცვასა და საპენსიო სფეროებს. როგორც პრემიერმა აღნიშნა, ეს ხაზს უსვამს საქართველოს მთავრობის მზადყოფნას, შექმნას თანამედროვე, განათლებული და ჯანსაღი კადრები, რომლებიც გლობალურ ეკონომიკაში კონკურენტუნარიანები იქნებიან.

„საერთო ჯამში, საქართველო იზრდება, ხდება უფრო მრავალფეროვანი, მისი ეკონომიკა ვითარდება; ხდება უფრო გამჭვირვალე, ამცირებს ბიუროკრატიის ხარისხსა და გადასახადებს; აკონტროლებს დეფიციტის დონეს და იღებს ყველა ზომას, რომ მისი სარეიტინგო მონაცემები ყოველწლიურად გაუმჯობესდეს. ეჭვი არ მეპარება იმაში, რომ საქართველო სწორ გზაზეა. შემოდგომაზე საქართველოში საპარლამენტო არჩევნები ჩატარდება და ვიმედოვნებ, საქართველოს მოსახლეობა კიდევ ერთხელ დაადასტურებს, რომ მყარად დგას ძლიერი დემოკრატიისა და კეთილდღეობის გზაზე. არჩევნები ამ დრომდე მიღწეული წარმატების გამოცდაც იქნება. წინა საპარლამენტო არჩევნების შედეგად, საქართველოს ისტორიაში პირველად, მოხდა ხელისუფლების მშვიდობიანი ცვლილება. დარწმუნებული ვარ, მოსალოდნელი არჩევნები ისტორიაში შევა, როგორც ნების გამოხატვის პირველი თავისუფალი და გამჭვირვალე პროცესი“, - განაცხადა პრემიერმა.