,,პოლიტიკური აქცენტი რა თქმა უნდა იყო... მე მჭირდება კვალიფიციური ხალხი“

,,პოლიტიკური აქცენტი რა თქმა უნდა იყო... მე მჭირდება კვალიფიციური ხალხი“ - პრეზიდენტი გუნდის შესახებ

პოლიტიკა - 21:52, 27 Jun, 2016

1989

გიორგი მარგველაშვილი აცხადებს, რომ პრეზიდენტის საპარლამენტო მდივნად ანა დოლიძის დანიშვნა მისი წარსული გამოცდილების გათვალისწინებით მოხდა.

საქართველოს პრეზიდენტის თქმით, უზენაესი სასამართლოს წევრად დოლიძის წარდგენაც სწორედ ამ ფაქტორის გათვალისწინებით მოხდა.

"მე ანა დოლიძე წარვადგინე არა მისი თამასით, არა პოლიტიკური სიმპათიით, არამედ მე ანა დოლიძე წარვადგინე მისი წარსულით და ჩვენი ქვეყნის წარსულიდან გამომდინარე. მე დოლიძე წარვადგინე, როგორც წინა ხელისუფლების დროს სასამართლო სისტემის უსამართლობასთან მებრძოლი ფიგურა. ბევრს ვერ დამისახელებთ, ვერც პარლამენტში და ვერც გარეთ, რომელსაც ამდენი და ასე თამამად ჰქონდეს გაკეთებული უსამართლობის წინააღმდეგ საბრძოლველად. აქ პოლიტიკური აქცენტი რა თქმა უნდა იყო, მაგრამ არა ის, რომ ჩემი გუნდის წევრი იყო ან მოიაზრებოდა, აქ პოლიტიკური აქცენტი იყო იმასთან დაკავშირებით, რომ იმ უსამართლობის საპასუხოდ რომელიც იყო, ყველაზე ნათელი გზავნილი როგორც სასამართლოსთვის ასევე საზოგადოებისთვის, რომ ანა დოლიძე რომელიც იბრძოდა წინა ხელისუფლების დროს უსამართლობისთვის წინააღმდე, დანიშნულიყო ამ თანამდებობაზე და ის ადამიანები, რომლებმაც პულტს არ დააჭირეს, არასოდეს ყოფილან ისეთი აქტიური როგორიც იყო ანა"- აღნიშნა პრეზიდენტმა გადაცემა "ბარიერში" მონაწილეობისას.

ჟურნალისტი დაინტერესდა ქმნის თუ არა მარგველაშვილი პოლიტიკურ გუნდს რაზეც ქვეყნის პირველმა პირმა თქვა, რომ მისი მიზანია არსებულ რეალობაში კვალიფიციური გუნდი შემოიკრიბოს.

"ყოველთვის მქონდა მცდელობა განსაკუთრებული კვალიფიკაციის ადამიანები შემომეკრიბა. არამარტო ადმინისტრაციაში არამედ უშიშროების საბჭოშიც მაღალი რანგის პროფესიონალები მუშაობენ. მნიშვნელოვანია ყოველთვის უფრო გავაძლიერო ჩემს ირგვლივ კვალიფიციური ადამიანები რაც ემსახურება იმ მანდატს რაც უნდა მივიღო კი არა რაც გამაჩნია. ჩემი კონსტიტუციური ვალდებულებების აღსასრულებლად მე მჭირდება კვალიფიციური ხალხი ანა დოლიძის თემაც ეს არის. ასეთი ადამიანი რომელსაც ბევრი სიკეთის მოტანა შეუძლია შემთხვევით არდამტკიცებული არ უნდა ყოფილიყო"- თქვა პრეზიდენტმა.