"გავიარეთ უკვე ეგ საკითხი"- ხიდაშელს კობალაძე შეცვლის?

პოლიტიკა - 15:06, 27 Jun, 2016

6099

მედიაში აქტიურად განიხილება ინფორმაცია, რომ ვეტერანთა სახელმწიფო დეპარტამენტის ხელმძღვანელი კობა კობალაძე თინა ხიდაშელს შეცვლის და თავდაცვის სამინისტროს ჩაუდგება სათავეში. არსებული ინფორმაციით, ვარშავის სამიტის შემდეგ, თავდაცვის მოქმედი მინისტრი თანამდებობას ტოვებს. სწორედ ამის მანიშნებელია კობალაძის გააქტიურება, ამბობენ იმასაც, რომ კობალაძე სამხედრო საქმეებით უფროა დაკავებული ვიდრე, ვეტერანებთან დაკავშირებული პრობლემების მოგვარებით. ის აქტიურად ჩნდება პოლიგონებზე, სამხედრო წვრთნების დაწყებასა და დასრულების ცერემონიალებზე.

"ახალი თაობა" წერს, რომ კობა კობალაძეს სამი თვის განმავლობაში საზღვარგარეთ არც ერთი მივლინება არ ჰქონია ვეტერანებთან დაკავშირებით, ხოლო ივნისის დასაწყისში თავდაცვის სამინისტროს ხელმძღვანელებთან ერთად იგი ავღანეთში იმყოფებოდა და "მტკიცე მხარდაჭერის" მისიაში მყოფ ჯარისკაცებს ქართულ-ავღანური ლექსიკონები ჩაუტანა.

ახალი თაობა წერს, 1000 ცალი წიგნის დაბეჭდვა ვეტერანთა სახელმწიფო დეპარტამენტს ბიუჯეტიდან გამოყოფილი თანხით მოხდა. "ყოველივე ეს საფუძვლიან ეჭვს ბადებს, რომ, შესაძლოა ცოტა ხანში კობალაძე თავდაცვის მინისტრად ვიხილოთ" - წერს გამოცემა.

"ნიუპოსტმა" გავრცელებული ინფორმაციის გადამოწმება თავად კობალაძესთან სცადა. ვეტერანთა სახელმწიფო დეპარტამენტის ხელმძღვანელმა მოკლე კომენტარი გააკეთა და ტელეფონი გაგვითიშა.

"გავიარეთ უკვე ეგ საკითხი ჩემო კარგო, ვერ გავიგე ჩვენ რეალური ინფორმაციის გავრცელება გვინდა თუ ჭორების?"- აღნიშნა კობალაძემ.