,,ქვეყანას თქვენი ასაკისთვის დამახასიათებელი თამამი გადაწყვეტილებები სჭირდება“

,,ქვეყანას თქვენი ასაკისთვის დამახასიათებელი თამამი გადაწყვეტილებები სჭირდება“ - პრემიერმა ახალგაზრდებს მიმართა

პოლიტიკა - 19:26, 26 Jun, 2016

1384

,,ქართული ოცნების“ ახალგაზრდული ორგანიზაციის ყრილობას გიორგი კვირიკაშვილი მიესალმა. პრემიერმა თავის გამოსვლაში ახალგაზრდებს წარმატებები უსურვა და აღნიშნა, რომ დღეს სახელმწიფოს სჭირდება სწორედ ახალგაზრდული იდეები და შემართება.

”ძალიან მოხარული ვარ, რომ ამდენ ანთებულ და შემართულ ახალგაზრდას ვხედავ. კიდევ უფრო სასიხარულოა, რომ ეს ახალგაზრდები ჩვენი პოლიტიკური გაერთიანების წევრები არიან. დარწმუნებული ვარ, თქვენ ყველანი კარგად აცნობიერებთ, რომ იმ პარტიის ახალგაზრდულ ფრთას წარმოადგენთ, რომელსაც დღეს ქვეყნის მართვის პასუხსიმგებლობა აქვს ნაკისრი. ეს არის ჩვენი პარტიისთვის, თითეოული წევრისთვის, ძალიან საპატიო საქმე და ამავე დროს უდიდესი პასუხისმგებლობა. პარტია ”ქართული ოცნება” ყოველდღიურად იკრებს ძალას და ორიენტირებულია განვითარებასა და სიახლეზე. ჩვენ გვჭირდება ახალი იდეები, ახალი ხედვები, ინიციატივები და რაც მთავარია, გვჭირდება ახალგაზრდული ენერგია. თქვენი ენერგია”, - განაცხადა კვირიკაშვილმა.

პრემიერმა აღნიშნა, რომ ახალგაზრდების ჩართვა პოლიტიკურ ცხოვრებაში მნიშვნელოვანია, მან იმედი გამოთქვა, რომ დღევანდელი ახალგაზრდობა მათი საქმის ღირსეული გამგრძელებელი იქნება.

”თქვენი ასაკისთვის დამახასიათებელი თამამი გადაწყვეტილებები საჭირო და მნიშვნელოვანია ჩვენი ქვეყნის მომავლისთვის, განვითარებისთვის. ახალგაზრდების მონაწილეობა ქვეყანაში მიმდინარე პროცესებში, სახელმწიფოებრივი განვითარების თქვენული ხედვა და აქტიური ჩართულობა პარტიის საქმიანობაში ძალიან მნიშვნელოვანია. დარწმუნებული ვარ, რომ თქვენ ყველა იმ საქმის თანამონაწილე იქნებით, რომელიც ჩვენ სამშობლოს უდიდეს წარმატებას მოუტანს. მინდა იცოდეთ, პოლიტიკაში მონაწილეობა მაშინ არის სიკეთის მომტანი თუ ეს სამშობლოს ემსახურება, სახელმწიფოს მშენებლობასა და ქვეყნის კეთილდღეობას ხმარდება. მაღალი ღირებულებების ერთული და სხელმწიფოებრივად მოაზროვნე ადამიანები აშენებენ წარმატებულ ქვეყანას, ასეთებად მიმაჩნიხართ თქვენ“ - განაცხადა გიორგი კვირკაშვილმა.