რატომ ფეთქდება დედაქალაქში ყვითელი ავტობუსები - საზოგადოებრივი ტრანსპორტი უსაფრთხო აღარ არის

პოლიტიკა - 21:05, 24 Jun, 2016

24473

თბილისში საზოგადოებრივი ტრანსპორტით მგზავრობა უსაფრთხო აღარ არის. ყვითელ ავტობუსებს, ექსპლუატაციის ვადა გასდით და ხშირ შემთხვევაში გამოდის მწუობრიდან. ამის პარალელურად დავით ნარმანია თითქმის ყოველ სამ თვეში ერთხელ დებს პირობას რომ მერია ახალი ავტობუსების შემოყვანას იწყებს, მაგრამ დაპირება-დაპირებად რჩება.
სულ ცოტა ხნის წინ რუსთაველის გამზირზე ცეცხლი გაუჩნდა ყვითელ ავტობუსს. როგორც "ნიუპოსტის" კორესპოდენტი ადგილიდან იტყობინება, ყვითელ ავტობუსს ცეცხლი გაუჩნდა. ავტობუსში მყოფმა კონტროლიორებმა კი მგზავრების ევაკუაცია მოახდინეს.

ხანძრის გამომწვევ მიზეზად ძველი, ელექტროსადენები სახელდება.

ტრანსპორტისა და გზების ასოციაციაში ამტკიცებენ, რომ თბილისში სატრანსპორტო ქსელი უმძიმეს მდგომარეობაშია.

„დღეს თბილისს ემსახურება 500-მდე ამორტიზირებული ავტობუსი, რაც საერთოდ არ არის ადეკვატური მგზავრთა ნაკადის რაოდენობის. ერთ ავტობუსზე მოდის 1400 მგზავრი. აღსანიშნავია, რომ დედაქალაქს ემსახურებოდა 500 ავტობუსი 70-80-იან წლებში, როდესაც თბილისის მოსახლეობა არ აღემატებოდა 700 000-ს. დღეს კი, თბილისის მოსახლეობა შეადგენს დაახლოებით 1 400 000-ს, ანუ ორჯერ უფრო მეტს, შესაბამისად, დედაქალაქის მგზავრთა ნორმალურად გადაყვანისთვის საჭიროა ორჯერ უფრო მეტი რაოდენობის ავტობუსი (1000 ერთეული).

პრობლემას ართულებს ისიც, რომ თბილისის მერიამ დააგვიანა სატენდერო წინადადების მომზადება და შესაბამისად ავტობუსების შეძენაც. სამწუხაროდ, ახალი ავტობუსები (170) კი არ დაემატება ძველ ავტობუსებს, არამედ ჩაანაცვლებს სრულიად ამორტიზირებულ ავტობუსებს. საერთო ჯამში კი, ავტობუსების რაოდენობა (500) დარჩება უცვლელი და მგზავრებს ისევ მოუწევთ ფეხზე დგომა, ოღონდ მგზავრთა ნაწილს უკვე ახალ ავტობუსში“, - აცხადებენ ასოციაციაში.

არსებულ პრობლემებზე საუბრობს ავტოექსპერტი დავით მესხიშვილიც. მისი თქმით, საზოგადოებრივი ტრანსპორტი არამარტო არაკომფორტულია, არამედ საფრთხის შემცველია.

" ერთადერთი გამოსავალი ახალი ავტობუსების შეძენაა. ჩვენ ვითხოვდით, რომ საუკეთესო ვარიანტი იქნებოდა, ეს ყოფილიყო ელექტრომობილი ავტობუსები, თუმცა, მერიამ ამაზე უარი თქვა, ახლა აპირებენ გაზზე მომუშავე ავტობუსების შემოყვანას"- აცხადებს მესხიშვილი.