საქართველოს თავდაცვის მინისტრი თინა ხიდაშელი ევროკავშირიდან დიდი ბრიტანეთის გასვლის თაობაზე მიღებულ გადაწყვეტილებასთან მიმართებით კომენტარს აკეთებს. სახელმწიფო მინისტრის განცხადებით, დემოკრატია ერთ აზრზე ყველას ყოფნას არ ნიშნავს. იგი ასევე იმედოვნებს, რომ მომხდარი „ევროპისთვის გამომაფხიზლებელი რეფერენდუმის შედეგი“ იქნება:

„ეს არის სწორედ დემოკრატია, სადაც ხანდახან დემოკრატიული პროცესის შედეგად დგება ისეთი შედეგი, რომლითაც ყველა ბედნიერი არ არის. დემოკრატია არ ნიშნავს ერთ აზრზე ყველას ყოფნას და არ ნიშნავს სამხედრო წესრიგს საზოგადოებაში. დემოკრატია ხანდახან ასეთ შედეგებამდე მიდის. დიდი იმედი მაქვს, რომ საბოლოო ჯამში, ევროკავშირი და მისი სიძლიერე ამ რეფერენდუმის შედეგებით არ დაზარალდება. დაველოდოთ მოვლენების განვითარებას. ჯერ ყველაფერი წინ არის. ეს არის ერთი ძალიან დიდი პროცესის დასაწყისი, რომელიც შეიძლება მძიმე იყოს ევროპისთვის, მაგრამ შეიძლება იყოს გამომაფხიზლებელი. იმედს ვიტოვებ, რომ ეს იქნება ევროპისთვის გამომამფხიზლებელი რეფერენდუმის შედეგი“, - აცხადებს თავდაცვის მინისტრი.