"ისინი არსად გარბიან, მათ ევროპა ახალი აღმოჩენებისკენ მიჰყავთ"- ზურაბ ჭიაბერაშვილი დიდ ბრიტანეთზე

პოლიტიკა - 13:47, 24 Jun, 2016

2555

ქართველი პოლიტიკოსი და ერთიანი ნაციონალური მოძრაობის სამოქალაქო საზოგადოებასთან ურთიერთობის მდივანი ზურაბ ჭიაბერაშვილი დიდ ბრიტანეთში ჩატარებული რეფერენდუმის შედეგებს ეხმაურება, რომლის თანახმადაც დიდი ბრიტანეთის მოსახლეობამ ევროკავშირის დატოვებას დაუჭირა მხარი. ზურაბ ჭიაბერაშვილის განცხადებით უზარმაზარ პატივისცემას იმსახურებს ბრიტანელი ხალხის გამბედაობა და სიმამაცე, რომლებსაც შეუძლიათ ყველაზე თამამი გადაწყვეტილებები მიიღონ, სამყაროს თამაშის ახალი წესები შესთავაზონ:
"თუკი მიგვაჩნია, რომ სამყარო, როგორიც ის დღეს არის, უფრო უკეთესია, ვიდრე იყო 200, 400 ან 800 წლის წინათ, ამაში ანგლო-საქსების დამსახურება უპირველესი და უდიდესია. 1215 წლიდან მოყოლებული, როდესაც "თავისუფლებათა დიდი ქარტია" (Magna Carta) შედგა, კუნძული მაგალითის მიმცემია დანარჩენი მსოფლიოსათვის. იგი იყო და რჩება თავისუფლების სიმბოლოდ, სადაც ხალხი წყვეტს თავის მომავალს; სადაც დემოკრატია უბრალოდ არჩევნების ჩატარება არაა; სადაც არასოდეს შეშინებიათ ყველაზე გაურკვეველი მომავლისაც კი. ბრიტანელების არჩევანი შეიძლება გაირჩეს პოლიტიკურად, ეკონომიკურად, გაკეთდეს პროგნოზები, გამოითქვას ვარაუდები. რეფერენდუმის შედეგების შეფასებაც ამის მიხედვით მოხდება და ეს დროის საქმეა. რაშიც უზარმაზარ პატივისცემას იმსახურებს ეს ხალხი, არის გამბედაობა და სიმამაცე, ყველაზე ღრმა და უკიდეგანო ზღვაში შეცურონ, ყველაზე თამამი გადაწყვეტილებები მიიღონ, სამყაროს თამაშის ახალი წესები შესთავაზონ. ისინი არსად გარბიან. მათ ევროპა ახალი აღმოჩენებისკენ მიჰყავთ. დიდება თავისუფლებას!"- წერს ზურაბ ჭიაბერაშვილი ფეისბუკზე.