„რუსთავი2“-ის ადვოკატი დიტო საძაგლიშვილი სიცრუეს უწოდებს სააპელაციო სასამართლოს მიერ გაკეთებულ განმარტებას იმასთან დაკავშირებით, თუ რატომ მოხდა სასამართლოს მიერ დასაბუთებული განჩინების რუსთავი2-სთვის ჩაბარება. ტელეკომპანიის უფლებადამცველის განცხადებით განჩინების გაგზავნა მხოლოდ გამონაკლის შემთხვევებში ხდება, მაშინ როდესაც მხარე სოციალურად დაუცველი ან პატიმარია, რუსთავი2 კი ამ გამონაკლისების კრიტერიუმში არ ჯდება:

„სააპელაციო სასამართლოს განცხადება არის უბრალოდ სამარცხვინო. ის დაფუძნებულია სიცრუეზე და მასში გაკეთებულია არაკვალიფიციური სამართლებრივი შეფასებები. სააპელაციო სასამართლო თავისივე განცხადებაში იყენებს ტერმინებს, რომლითაც ჩვენ ვაპელირებდით, ამბობს რომ 259-ე პრიმა მუხლი არის სპეციალური ნორმა და აგრეთვე ამბობს, რომ მეორე ნაწილი იმპერატიულია,რაც გულისხმობს იმას, რომ მხოლოდ ორ შემთხვევაშია სასამართლო მხარეებისთვის გადაწყვეტილების გამგზავნი და არცერთ გამონაკლისში ჩვენ არ ვჯდებოდით და შესაბამისად სააპელაციო სასამართლომ არასწორად შეაფასა საპროცესო კოდექსის განმარტებები , უფრო სწორად მიზანმიმართულად იცრუა. რეალურად სასამართლო უფლებამოსილი არ იყო დასაბუთებული განჩინება გამოეგზავნა . სასამართლოში ჩვენ უნდა მივსულიყავით და ჩაგვებარებინა“- განაცხადა დიტო საძაგლიშვილმა.

აბსურდულს უწოდებს სასამართლოს მიერ გაკეთებულ განცხადებას რუსთავი2-ის მეორე ადვოკატი თამთა მურადაშვილიც.

შეგახსენებთ, სააპელაციო სასამართლომ დღეს განცხადება გაავრცელა , რომელშიც განმარტა თუ რატომ გაეგზავნა „რუსთავი2“-ს განჩინება , იმის ნაცვლად რომ ტელეკომპანიის ადვოკატები თავად მისულიყვნენ სასამართლოში განჩინებსი ჩასაბარებლად.