იუსტიციის უმაღლეს საბჭოში მოსამართლეობის კანდიდატებთან გასაუბრების მეორე ეტაპი გაიმართა. მოსამართლეობის მსურველებს შორის „რუსთავი2“-ის საქმის მოსამართლე, სკანდალურად ცნობილი თამაზ ურთმელიძეც იყო. ურთმელიძესთან გასაუბრების ძირითად თემას რუსთავი2-ის საქმე წარმოადგენდა.

როგორც თამაზ ურთმელიძემ გასაუბრებაზე განაცხადა რუსთავი2-ის საქმის განხილვის დროს მისი მისამართით გაკეთებული განცხადებებით მისი ღირსება და პატივი შეილახა და თუ ის სამომავლოდ გახდება მოსამართლე შეეცდება სიტყვისა და გამოხატვის თავისუფლებას გარკვეული ზღვარი დაუწესდეს. მას სურს რომ არსებობდეს გარკვეული ჯგუფი რომელიც ამას გააკონტროლებს. ურთმელიძემ უკმაყოფილება მედიის წარმომადგენლების განათლების დონესთან დაკავშირებითაც გამოხატა და აღნიშნა, რომ ჟურნალისტები ობიექტურობას უნდა ემსახურებოდნენ .

ურთმელიძეს იუსტიციის უმაღლეს საბჭოზე მისი დედის მიმართ დაწყებული სისხლის სამართლებრივი დევნის შესახებაც კითხეს, რაზეც ურთმელიძემ განაცხადა, რომ მან თავის დროზე ამ საქმის დეტალები არ იცოდა, დედამისის უფლებადამცველი კი არწმუნებდა, რომ საქმე მსუბუქი იყო და განრიდებით მოგვარდებოდა, თუმცა, როგორც საბოლოოს გაირკვა საქმე სასამართლოში მაინც გაგრძელდა.

საბჭოს წევრებმა ურთმელიძეს სხვადასხვა ქვეყნის სასამართლოების პრეცენდენტული გადაწყვეტილებების გამოყენების შესახებაც კითხეს და დაინტერესდნენ, რამდენად კარგად ფლობს ურთმელიძე უცხო ენას, იმისთვის რომ მსგავსი გადაწყვეტილებებს გაეცნოს და თავისი განაჩენების დასაბუთების დროს გამოიყენოს. ურთმელიძის თქმით მისი ინგლისური უმაღლესი დონის არაა, თუმცა ხშირად იყენებს ლექსიკონს. რუსთავი2-ის საქმის დასაბუთებისას გამოყენებული გერმანული სასამართლოს პრეცენდენტის მოძიებისას კი სასამართლოს თანამშრომელი დაეხმარა .

გასაუბრებიდან გამოსულმა თამაზ ურთმელიძემ ჟურნალისტის შეკითხვაზე პასუხების გაცემა არ ისურვა და განაცხადა, რომ როდესაც მზად იქნება თავად დაუკავშირდება მედიას.