ქალაქ ხაშურში და დაბა სურამში საგზაო ინფრასტრუქტურის კაპიტალური მშენებლობა მიმდინარებს. ამ დროისთვის აგარა-ჯორჯაძის გზის ასფალტირების სამუშაოების 30% დასრულებულია. გზის 1600 მეტრიანი მონაკვეთის სრული სარეაბილიტაციო სამუშაოების დასრულების შემდეგ 3000-ზე მეტ ადგილობრივ მცხოვრებს მოასფალტებული და კეთილმოწყობილი ქუჩა ექნება.

დაბა სურამში, საკურორტო ზონაში, 9 აპრილის ქუჩის მიმდინარედ, 650 მეტრი სიგრძის ასფალტ-ბეტონის გზის დაგება მიმდინარეობს. პროექტის განხორციელების შედეგად 1000-ზე მეტი ადგილობრივი მცხოვრები ისარგებლებს კეთილმოწყობილი საგზაო ინფრასტრუქტურით. რეაბილიტირებული ქუჩა განსაკუთრებულ კომფორტს შეუქმნის, როგორც ადგილობრივ, ისე უცხოელ ტურისტებს.

აღნიშნული გზების სამშენებლო სამუშაოები ხაშურის მუნიციპალიტეტის გამგებელთან, გიორგი გურასპაშვილთან ერთად, შიდა ქართლის გუბერნატორის მოვალეობის შემსრულებელმა, იოსებ ოქრომელიძემ და გუბერნატორის მოადგილემ, ამირან შავშიშვილმა დაათვალიერეს.

როგორც გუბერნატორის მოვალეობის შემსრულებელმა, იოსებ ოქრომელიძემ მიმდინარე სამუშაოების გაცნობის შემდეგ განაცხადა, მნიშნელოვანია, რომ პროექტები საკმაოდ ინტერსიურად მიმდინარეობს და ივლისის ბოლოს დასრულდება.

„პროექტები ინტენსიურ ფაზაშია და რაც ყველაზე მნიშვნელოვანია, უკვე მიმდინარე ტურისტულ სეზონზე ტურისტებს განახლებული ინფრასტრუქტურა დახვდებათ, რაც ხელს შეუწყობს სამომავლოდ კიდევ უფრო მეტი დამსვენებელი მიიღოს სურამმა. იმედს ვიტოვებ, რომ არა მხოლოდ უცხოელი, არამედ ადგილობრივი დამსვენებელიც უხვად ეყოლება ამ ულამაზეს კურორტს“, - აცხადებს გუბერნატორის მოვალეობის შემსრულებელი შიდა ქართლში, იოსებ ოქრომელიძე.

პროექტები რეგიონალური განვითარების ფონდის დაფინანსებით ხორციელდება და 2016 წლის ივლისში დასრულდება. სამუშაოებს შპს „გეკა“ ახორციელებს.