მცხეთაში სახელმწიფო დემოგრაფიული პროგრამის სამწლიანი ანგარიში კონცერტის თანხლებით გაიმართა

პოლიტიკა - 17:50, 20 Jun, 2016

593

„ჩვენ ერთმანეთს ძალიან ვჭირდებით“ - ამ მიზნით გუშინ მცხეთაში, პარლამენტის ჯანდაცვისა და სოციალურ საკითხთა კომიტეტისა და დემოგრაფიული აღორძინების ფონდის ინიციატივით დიდი ღონისძიება გაიმართა. ღონისძიება ეძღვნებოდა სახელმწიფო დემოგრაფიული პროგრამის 3 წლიან ანგარიშს, თუ რა გაკეთდა სამი წლის მანძილზე საქართველოში დემოგრაფიული მდგომარეობის გამოსასწორებლად და რა იგეგმება მომავალში, რაშიც საზოგადოების ჩართულობა უმნიშვნელოვანესია.

ღონისძიება გაიმართა მცხეთა-მთიანეთის გუბერნიისა და რეგიონის ყველა მუნიციპალიტეტის ორგანიზებით, ასევე ოფიციალური მხარდამჭერი იყო კავკასიის საერთაშორისო უნივერსიტეტი. ღონისძიება გაიმართა ცეკვისა და სიმღერის სახელმწიფო ანსამბლ „რუსთავის“ და ანსამბლ „მცხეთის“ მონაწილეობით. ასევე, მონაწილეობა მიიღეს ცნობილმა მსახიობებმა გივი ბერიკაშვილმა და კახი კავსაძემ. ოფიციალური პირებიდან დამსწრე საზოგადოებას სიტყვით მიმართეს ჯანდაცვის მინისტრმა დავით სერგეენკომ, დეპუტატებმა ზაქარია ქუცნაშვილმა და გიორგი ვოლსკიმ. ასევე, ცნობილმა კომენტატორმა ჯამლეტ ხუხაშვილმა, დემოგრაფმა ანზორ თოთაძე, დემოგრაფთა ასოციაციის პრეზიდენტმა ვაჟა ლორთქიფანიძემ და კავკასიის საერთაშორისო უნივერსიტეტის კანცლერმა ვახტანგ წივწივაძემ. ბოლოს კი ჯანდაცვისა და სოციალურ საკითხთა კომიტეტის თავმჯდომარემ და დემოგრაფიული აღორძინების ფონდის საპატიო თავმჯდომარემ დიმიტრი ხუნდაძემ.

ვაჟა ლორთქიფანიძემ დიმიტრი ხუნდაძეს ყველა ქართველი დემოგრაფის სახელით გადასცა სიმბოლური საჩუქარი - საქართველოს დემოგრაფიული ხე (სუვენირი), ხოლო ვახტანგ წივწივაძემ საზოგადოებას გააცნო უნივერსიტეტის აკადემიური საბჭოს გადაწყვეტილება, რის მიხედვითაც დიმიტრი ხუნდაძეს კავკასიის საერთაშორისო უნივერსიტეტის საპატიო დოქტორის წოდება მიენიჭა.

ღონისძიება მიყავდა დემოგრაფიული აღორძინების ფონდის თავმჯდომარეს თამარ ჩიბურდანიძეს და საზოგადოებრივი მაუწყებლის დილის პროგრამის პროდიუსერს ირაკლი ნიჟარაძეს. მცხეთა-მთიანეთის შემდეგ პარლამენტის ჯანდაცვისა და სოციალურ საკითხთა კომიტეტი და დემოგრაფიული აღორძინების ფონდი სხვა რეგიონებსაც ეწვევა სახელმწიფო დემოგრაფიული პროგრამის 3-წლიანი ანგარიშით.