,,სტრასბურგის ამ გადაწყვეტილების კონტექსტში პრეზიდენტი არ განიხილავს მერაბიშვილის შეწყალების საკითხს“

პოლიტიკა - 14:38, 20 Jun, 2016

4241

ვანო მერაბიშვილის საქმესთან დაკავშირებით სტრასბურგის სასამართლოს მიერ მიღებულ გადაწყვეტილებას საქართველოს პრეზიდენტის მრჩეველი, კახა კოჟორიძე ეხმაურება. ჟურნალისტის კითხვაზე, აპირებს თუ არა გიორგი მარგველაშვილი ვანო მერაბიშვილის შეწყალებას, კოჟორიძემ განაცხადა, რომ ევროსასამართლოს გადაწყვეტიელბას პრეზიდენტი აღნიშნულ კონტექსტში არ განიხილავს:

"სტრასბურგის სასამართლოს გადაწყვეტილების კონტექტსში პრეზიდენტი არ განიხილავს ვანო მერაბიშვილის შეწყალების საკითხს. მეორეს მხრივ ეს არ ნიშნავს იმას, რომ ეს გადაწყვეტილება არ არის დამაზიანებელი , ჩვენი შეფასებით სტრასბურგის გადაწყვეტილება დამაზიანებელია სახელმწიფო ინტერესებისთვის. სტრასბურგის სასამართლომ დაადგინა, რომ კონვენციის ორი მუხლის დარღვევა ვანო მერაბიშვილის მიმართებაში. ვინც არ უნდა იყოს ის, მით უმეტეს ასეთი მაღალი საჯარო ინტერესის მქონე საქმეზე პრობლემატური საკითხია და ამ შედეგს უნდა ჰყავდეს შესაბამისი სამართლებრივი და პოლიტიკური პასუხისმგებლობის მქონე პირი - ანუ კონკრეტულად იმ კონკრეტულმა პირებმა პოლიტიკურად და სამართლებრივად უნდა აგონ პასუხი რა შედეგიც დადგა. დავაზუსტებ, აუცილებელია გამოძიების ჩატარება, რათა დადგინდეს ნამდვილად მოხდა თუ არა ვანო მერაბიშვილის საკნიდან გაყვანა, თუ გამოძიებით დადგინდა ეს ფაქტი, შესაბამისად უნდა დაისაჯონ დამნაშავეები. გარდა ამისა მხოლოდ ის კი არ უნდა გამოვიძიოთ გაიყვანეს თუ არა ვანო მერაბიშვილი ციხიდან, ასევე ჩვენ უნდა გამოვიძიოთ ის, რატომ არ გამოიძიეს აქამდე ეს საკითხი. სისხლის სამართლის კოდექსი პროკურატურას ავალებდა რომ თავის დროზე გამოძიება დაეწყო. პირდაპირი ვალდებულებაა, არის კოდექსი სადაც არის ნათქვამი, რომ როდესაც სავარაუდო დანაშაულის შესახებ ინფორმაცია ვრცელდება პროკურატურა ვალდებულია ეს გამოიძიოს. შესაბამისად ჩვენი პოზიციაა, რომ თავის დროზე ეს გამოძიება რომ არ დაიწყო ეს შეიძლება თავის მხრივ ნიშნავდეს და შეიცავდეს დანაშაულის ნიშნებს. ამასაც გამოძიება უნდა და თუ დადგინდება, რომ თავის დროზე ვიღაცამ დანაშაული ჩაიდინა და ამიტომ არ გამოიძია ამასაც შესაბამისი სამართლებრივი რეაგირება უნდა მოჰყვეს"- აღნიშნა კოჟორიძემ.