უფასო სარეკლამო დრო - არასაპარლამენტო ოპოზიცია რესპუბლიკელების წინადადებას არ ეთანხმება

პოლიტიკა - 14:25, 20 Jun, 2016

1253

წინასაარჩევნო კამპანიის მიმდინარეობისას უფასო სარეკლამო დროსთან დაკავშირებული კანონპროექტი პარლამენტმა ორი მოსმენით უკვე განიხილა. მესამე მოსმენა კი სავარუდოდ მიმდინარე კვირას შედგება.

„რესპუბლიკური პარტიის“ ინიციატივას არასაპარლამენტო ოპოზიცია არ ეთანხმება. მათ ალტერნატიული წინადადებები აქვთ მომზადებული და ეს ინიციატივები პრეზიდენტ გიორგი მარგველაშვილსაც გააცნეს.

„ეს წინადადებები არის უკიდურესად შემჭიდროვებული, ხანდახან ღიმილისმომგვრელიც კი არის ის პაკეტი რაც ჩვენ თავიდან წარვადგინეთ და ის, რაც ახლა წარვუდგინეთ პრეზიდენტსაც და რასაც შევთავაზებთ ხელისუფლებასაც. ეს არის ერთის მხრივ კვალიფიციური სუბიექტის ბარიერის დაწევა, სტატუსის განსაზღვრისათვის, მეორე, ეს გახლავთ სამართლიანად განაწილება სარეკლამო დროისა და მესამე ეს გახლავთ კვალიფიციური სუბიექტებისათვის საარჩევნო ნორმის შენარჩუნება, ის, რაც ჰქონდათ მათ წინა არჩევნების დროს“, - აცხადებს მამაუკა კაციტაძე.

„დემოკრატიული მოძრაობის“ წევრი გიორგი ახვლედიანი აცხადებს, რომ ვახტანგ ხმალაძისა და იურიდიული კომიტეტის მიერ მომზადებული კანონპროექტი არღვევს პოლიტიკური პარტიების უფლებებს:

„ის კანონპროექტი, რომელიც მოამზადა ვახტანგ ხმალაძემ და იურიდიულმა კომიტეტმა, არღვევს პოლიტიკური პარტიების უფლებებს, ართმევს მათ უფასო სარეკლამო საეთერო დროის დიდ ნაწილს და ითვისებენ საკუთარი ინტერესების გათვალისწინებისთვის და არღვევს ტელევიზიების ინტერესებს. ვცდილობთ შევაჯეროთ სამუშაო ჯგუფში ისეთი ვარიანტი, სადაც არც პოლიტიკური პარტიები დაზარალდებიან, 11 პოლიტიკურ პარტიას ექნება თანაბარი საეთერო დრო და არ წაერთმევა სხვას, მაგალითად „დემოკრატიული მოძრაობის“, „პატრიოტთა ალიანსისა“ და „ლეიბორისტების“ ხარჯზე. ასევე ტელევიზიებს კი არ გაუუარესდებათ მდგომარეობა, არამედ ჩვენ ვცდილობთ მოვიფიქროთ შეღავათიანი ვარიანტი“, - აღნიშნავს გიორგი ახვლედიანი.