ვანო მერაბიშვილის საქმე და საგარეო საქმეთა სამინისტროში დაბარებული უკრაინის ელჩი

პოლიტიკა - 21:11, 15 Jun, 2016

3280

საქართველოს საგარეო საქმეთა მინისტრის მოადგილემ, დავით ჯალაღანიამ საქართველოში უკრაინის საქმეთა დროებით რწმუნებული გიორგი ნაზაროვი დღეს უწყებაში მხოლოდ იმიტომ დაიბარა, რომ მიმდინარე წლის 14 ივნისს, გადაცემა „არჩევანში“ უკრაინის გენერალური პროკურორმა იური ლუცენკომ ვანო მერაბიშვილთან და სტრასბურგის სასამართლოს მიერ მიღებულ გადაწყვეტილებებთან დაკავშირებით განცხადება გააკეთა.

საგარეო უწყებაში მიაჩნიათ, რომ უკრაინელი მაღალჩინოსანის მიერ ტელეეთერით გაკეთებული განცხადება საქართველოს საშინაო საქმეებში ჩარევაა.

ჯანელიძის უწყებაში აღნიშნავენ, რომ უკრაინის გენერალური პროკურორის შეფასებები ივანე მერაბიშვილის საქმესთან დაკავშირებით ევროსასამართლოს მიერ გამოტანილ გადაწყვეტილებაზე არ შეესაბამება თავად ამ გადაწყვეტილების შინაარსს.

თავის მხრივ, ნაზაროვმა განაცხადა, რომ საქართველოს პოზიციას დაუყოვნებლივ აცნობებს კიევს.

ცნობისთვის, ლუცენკოს საქმეზეც ევროპის სასამართლომ ანალოგიური გადაწყვეტილება გამოიტანა, როგორიც მერაბიშვილთან მიმართებაში დააფისირა.

სტრასბურგის სასამართლოს გადაწყვეტილების გამო უკრაინის მაშინდელი პრეზიდენტი, ვიქტორ იანუკოვიჩი იძულებული გახდა ის საპატიმროდან გაეთავისუფლებინა. ქართული მხარის გაღიზიანება, სავარაუდოდ, უკრაინის გენერალური პროკურორის მხრიდან სწორედ მსგავსი პარალელების გავლებამ გამოიწვია.