უკრაინის გენერალური პროკურორი, იური ლუცენკო, მიიჩნევს, რომ იანუკოვიჩის პრეზიდენტობის დროს მისი დაპატიმრების საქმესა და ვანო მერაბიშვილის საქმე პოლიტიკურად მოტივირებულია. ამის შესახებ ლუცენკომ „რუსთავი 2“-ის გადაცემა „არჩევანში“ სატელეფონო ჩართვისას ისაუბრა:

„მე მაშინვე ვთქვი, რომ ეს საქმეები იყო აბსულუტურად იდენტური. იანუკოვიჩს ეშინოდა ჩემი და ტიმოშენკოსი და ჩაგვსვა ჩვენ ციხეში, რათა გაენადგურებინა ქვეყნის სუვერენიტეტი, თუმცა მას ეს არ გამოუვიდა. დარწმუნებული ვარ, რომ ეს ჰქონდა მიზნად საქართველოს ხელისუფლებას ვანო მერაბიშვილის შემთხვევაშიც. ეს დღეს უკვე არის იურიდიულად დამტკიცებული ევროსასამართლოს მიერ, რომ ვანო მერაბიშვილის საქმე პოლიტიკურად მოტივირებული იყო და თავად მერაბიშვილი პოლიტპატიმარია. მე არ გავავლებ პარალელებს იანუკოვიჩსა და ივანიშვილს შორის, ეს ჩემი კომპეტენცია არაა, ეს ქართველი ხალხის კომპეტენციაა.

იანუკოვიჩი მიიჩნევდა, რომ ყველაფერი იყო კარგად და ეს ყველაფერი ტრაგიკულად დასრულდა მისთვის და მისი პოლიტიკური სისტემისთვის. ადამიანებმა არ მოითმინეს უკანონობა, ქვეყნის სუვერენიტეტის რუსეთისთვის მიყიდვა და გამოვიდნენ მაედანზე და დაიცვეს კანონი და სამართალი. მე დიდი იმედი მაქვს, რომ ეს იქნება მწარე გაკვეთილი ყველა ქვეყნისთვის და საქართველოს ხელისუფლება გააკეთებს იმას, რაც მე შევძელი მხოლოდ რევოლუციის შემდეგ. იმედი მაქვს, ვანო მერაბიშვილთან მიიღებენ სამართლიან გადაწყვეტილებას სოციალური რყევების გარეშე,“ - განაცხადა ლუცენკომ.