საქართველოს ყოფილი პრემიერ-მინისტრის ბიძინა ივანიშვილის განცხადებით, არჩევნების შემდეგ თუ კოალიციური მთავრობის შექმნის საჭიროება დადგა ეს ქვეყანაში დამატებით პრობლემებს გამოიწვევს, რადგან საქართველოს მსგავსი ეკონომიკის ქვეყნებში, კოალიციური მთავრობები რესურსების ერთმანეთში გადანაწილებით არიან დაკავებული და რეფორმები უყურადღებოდ რჩებათ. ივანიშვილის შეფასებით მიუხედავად იმისა. რომ კოალიციური მთავრობა დემოკრატიული მოვლენაა და ამას ევროპა და ამერიკა მიესალმება, ის პრობლემა იქნება საქართველოსთვის:

"ჩვენ გვქონდა კოალიციური მთავრობა და სიტუაციას ჩემი პიროვნება აბალანსებდა, მაგრამ ახალ არჩევნებზე თუ 80 ხმაზე ნაკლებს მიიღებს "ქართული ოცნება" ეკონომიკური რეფორმების გატარება გაძნელდება. თუ ისევ კოალიციური მთავრობა შედგა, ძალიან ბევრ ახალ პრობლემას მივიღებთ. ასეთი მთავრობები ძირითადად სათავისოდ რესურსების განაწილებაში არიან და სერიოზული რეფორმები უყურადღებოდ რჩებათ, მე კოალიციური მთავრობის წინააღმდეგი არ ვარ. მაგრამ, ასეთი ეკონომიკის და მცირე დაფინანსების პირობებში როგორშიც ჩვენ ვართ, ძალიან რთული იქნება და საქართველოს სწორი მიმართულებით განვითარებას შეუშლის ხელს“- განაცხადა ივანიშვილმა.