"ნაციონალური მოძრაობის" ერთ-ერთი ლიდერი ბიძინა ივანიშვილს ურჩევს ჭორაობას შეეშვას და აქცენტი მოსახლეობის პრობლემებზე გაამახვილოს.

როგორც "ნიუპოსტს" მაჭავარიანმა განუცხადა, ყოფილი პრემიერი ურთიერთგამომრიცხავ განცხადებებს აკეთებს, "როცა ღია წერილში აცხადებს, რომ ნაციონალური მოძრაობის დაბრუნების საფრთხე არსებობს, დღეს კი ჟურნალისტებს ეუბნება, რომ ენმ საარჩევნო ბარიერს ვერ გადალახავს.

"ნაციონალურ მოძრაობას აქვს ყველა შანსი რომ ამ არჩევნებზე პირველ ადგილზე გავიდეს, რადგან სწორედ ჩვენ ვსაუბრობთ ხალხის პრობლემებზე, ჩვენ ვსაუბრობთ იმაზე თუ რა ჩიხში შეიყვანა ჩვენი ქვეყანა ბიძინა ივანიშვილმა და "ქართულმა ოცნებამ", ჩვენ ვთავაზობთ ამომრჩეველს გამოსავალს ივანიშვილი კი შუღლის და დაპირისპირების დათესვითაა დაკავებული. სწორედ ივანიშვილია პასუხისმგებელი ეკონომიკურ სტაგნაციაზე, უმუშევრობაზე, ლარის გაუფასურებასა და და იმაზე რაც მისმა გუნდმა დამართა ამომრჩეველს"- აღნიშნა მაჭავარიანმა.

რაც შეეხება არჩევნების გაყალბებაში დადანაშაულებას, მაჭავარიანი აცხადებს, რომ "ივანიშვილმა მაგ სიმართლით იაროს".

"რაში აინტერესებს მშიერ მოსახლეობას ეს ჭორაობა? იმისი არ იყოს რომ თითქოს სტადიონი მივითვისე - მაგ სიმართლით იაროს. მერე თქვა, რომ ძმებს თურმე თბილი ურთიერთობა ჰქონიათო, რა თქმა უნდა ურთიერთობა გვექნება, განურჩევლად ჩვენი პოლიტიკური შეხედულებისა. არ ვაპირებ გამოვდგე და ამ ჭორაობას ჭორაობით ვუპასუხო, ივანიშვილი დაკავებულია შუღლის შემოტანით და მე მას ამ სპექტაკლში არ ავყვები. არჩევნების გაყალბების მექანიზმი არ არსებობს, თუ ხელისუფლებამ თავზე ხელი არ აიღო და მთელი ოპოზიცია არ გამოყარა. არჩევნები ვერ ყალბდებოდა ადრეც - ეს ისეთივე განცხადებაა, როგორიც ტარიფებს გვინახევრებდა ბატონი ბიძინა და უფასო ფულს დაარიგებდა. მიჭავარიანზე ჭორაობას სჯობია პასუხისმგებლობა აიღოს იმაზე რაც დამართა ქვეყანას"- განაცხადა "ნიუპოსტთან" ენმ-ს ლიდერმა.

მიხეილ მაჭავარიანის განცხადებით, ის ივანიშვილს პირადად იცნობს, თუმცა თავს არ მისცემს უფლებას პიროვნულად ისაუბროს მასზე.

"თვითონ კი აცხადებს, რომ საერთოდ არ ვიცნობთ ერთმანეთს, როგორ გგონიათ ეს მართალია? - ეს იყო ტყუილი, მე არ გამოვდგები და არ ვიჭორავებ და არ მოვყვები რაღაცეებს. მე მას არამარტო თანასოფლელს ისე ვიცნობ, თუმცა ეს არ აინტერესებს საზოგადოებას"- განმარტა მიხეილ მაჭავარიანმა.

ჟურნალისტებთან შეხვედრაზე ბიძინა ივანიშვილმა ნაციონალური მოძრაობის წევრი მიხეილ მაჭავარიანი გააკრიტიკა და მას ,,ყველაზე მაგარი გამყალბებელი უწოდა“