დღეს გამართულ გორის საკრებულოს რიგგარეშე სხდომას ფრაქცია "ქართული პარტიის" არც ერთი წევრი არ დაესწრო. აღნიშნულის შესახებ გადაწყვეტილება ფრაქციის წევრებმა სხდომის დაწყების წინ ერთ ხმად მიიღეს. ამის მიუხედავად საკრებულოს წევრებმა დღის წესრიგით გათვალისწინებული ერთი საკითხი მაინც მიიღეს, რომელიც ბიუჯეტში ცვლილებებს გულისხმობს, სხდომას საკრებულოს თავმჯდომარის მოადგილე უძღვებოდა. ფრაქცია ,,ქართული პარტიის" წევრები დღევანდელ სხდომაზე მიღებული გადაწყვეტილების გასაჩივრებას სასამართლოში გეგმავენ, რადგან გადაწყვეტილებას არალეგიტიმურს უწოდებენ. საპირისპირო პოზიცია აქვთ საკრებულოს იმ წევრებს რომლებმაც ბიუჯეტში ცვლილებების დამტკიცებას მხარი დაუჭირეს. სხდომა ხმაურის ფონზე მიმდინარეობდა.

"დღევანდელი საკრებულოს სხდომა არის არალეგიტიმური და უპასუხისმგებლო, რადგან მაშინ როდესაც გორი წვიმამ დააზიანა და მოსახლეობა დააზარალა ბატონი საკრებულოს წევრები იმაზე მსჯელობენ როგორ გაუზარდონ დაფინანსება კომედიის თეატრს. აქედან გამომდინარე ჩვენი ფრაქცია ამ არალეგიტიმურ სხდომაში მონაწილეობას არ მივიღებთ და აუცილებლად გავასაჩივრებთ სასამართლოში"-აცხადებს ფრაქცია "ქართული პარტიის" წევრი ლერი ლაფაჩი. "ეს სხდომა არის ლეგიტიმური, კანონმდებლობით მიღებული, არავითარ დარღვევას არ ჰქონია ადგილი. ნება მათია გაასაჩივრონ სასამართლოში, ჩვენ ვიმოქმედეთ კანონის ფარგლებში"-აცხადებს საკრებულოს თავმჯდომარის მოადგილე ზურაბ როსებაშვილი.