"ჯავახიშვილი ჩემი დისგან ფულის ჩარიცხვას ითხოვდა"- რას აცხადებს მანანა კობახიძის ძმა ბრალდებებზე

პოლიტიკა - 19:54, 13 Jun, 2016

3154

თბილისის საკრებულოს იურიდიული კომისიის თავმჯდომარე თედო კობახიძე ყოფილი თანამშრომლის ბრალდებებს სიცრუეს უწოდებს და ბადრი ჯავახიშვილს ზეწოლასა და გამოძალვაში ადანაშაულებს.

"ბადრი ჯავახიშვილის მხრიდან ჩემსა და ჩემი ოჯახის წევრის მიმართ ხორციელდებოდა მუქარა და გამოძალვის ფაქტები. ამაზე გამოძიება მიმდინარეობს. მან ჩემი ოჯახის წევრს მიწერა მესიჯი, სადაც მან "ლიბერთი ბანკის" საბანკო რეკვიზიტები მიუთითა და მოითხოვა, რომ ეს თავის .ე.წ კომპრომატი, რომელიც მისი მოგონილი და ფანტაზიის ნაყოფია, რომ არ გასაჯაროებულიყო, კონკრეტულად მანანა კობახიძეს, საქართველოს პარლამენტის პირველ ვიცე სპიკერს, ჩაერიცხა მის ანგარიშზე 5 ათასი ლარი. ბადრი ჯავახიშვილი იყო ჩემი პარალელური კლასელი, რომელსაც წლების განმავლობაში გამიმართავს ხელი ადამიანური ფაქტორიდან გამომდინარე. ხშირად მისესხებია მისთვის ფული. ამ ყველაფერს მოწმობს ისიც, რომ იგი საბოლოო ჯამში საკრებულოში აღმოჩნდა დასაქმებული შრომითი ხელშეკრულებით. ჩემთვის სამწუხაროა, რომ ამას ვასაჯაროებ და ეს მორალში ნამდვილად არ ჯდება, თუმცა ამ ადამიანმა სხვა გზა არ დამიტოვა“- განაცხადა კობახიძემ.

შეგახსენებთ, თბილისის საკრებულოს იურიდიული კომისიის თავმჯდომარეს ყოფილი თანამშრომელი ფულის გამოძალვაში, ე.წ. ატკატების აღებაში ადანაშაულებს. რუსთავი 2-თან საუბარში საკრებულოს ყოფილი თანამშრომელი ბადრი ჯავახიშვილი ამბობს, რომ თედო კობახიძე ყოველთვიურად მისი ხელფასის 35%-ს იღებდა.