"კიბერუსაფრთხოებას ვიდეოების დაბლოკვა რამდენიმე წუთში შეეძლო, ვიღაცას აწყობდა და არ გააკეთეს"

"კიბერუსაფრთხოებას ვიდეოების დაბლოკვა რამდენიმე წუთში შეეძლო, ვიღაცას აწყობდა და არ გააკეთეს" - ფეიქრიშვილი

პოლიტიკა - 13:12, 13 Jun, 2016

3771

ინტერნეტ სივრცეში პირადი ცხოვრების ამსახველი კადრები კვლავ გავრცელდა. წუხელ ის რამდენიმე ადამიანს გაეგზავნა, ერთ-ერთი მათგანია ორგანიზაცია "ამბრელას" წევრი, ლუკა ფეიქრიშვილი.

როგორც ფეიქრიშვილმა "ნიუპოსტს" განუცხადა, სოციალური ქსელით ვიდეო მისამართის რამდენიმე ბმული მიიღო, რის შესახებაც მან სამართალდამცველებს მიმართა.

მოგვიანებით ფეიქრიშვილის სახლში კიბერუსაფრთხოების სამსახურის და პროკურატურის წარმომადგენლები მივიდნენ და პროგრამისტი მთავარ პროკურატურაში დაკითხვაზე გადაიყვანეს.

ფეიქრიშვილი კიბერუსაფრთხოების სამსახურს უმოქმედობაში ადანაშაულებს და აცხადებს, რომ "სურვილის შემთხვევაში" იმ საიტების დაბლოკვა, სადაც აღნიშნული ვიდეოები გავრცელდა რამდენიმე წუთში შეიძლებოდა.

"არჩევნები ახლოვდება და კადრების გავრცელებით სურს ვიღაცას, დაეცეს რომელიმე პოლიტიკური პარტიის რეიტინგი. რაც შეეხება პროკურატურაში ჩემს დაკითხვას, მითხრეს, რომ საქმეზე გამოძიება მიმდინარეობს, თუმცა არის ერთი საინტერესო დეტალი: უშუალოდ ეს ვიდეოები ატვირთულია 4 კვირის წინ და ამ დროის განმავლობაში ქვეყნის კიბერუსაფრთხოების სამსახურმა ვერ მოახერხა ვიდეოების ბლოკირება, ეს ძალიან დიდი სირცხვილია, ან არის მეორე ვარიანტი - მათ ეს არ გააკეთეს. უშუალოდ ვიდეოების ამტვირთავის იდენთიფიცირებას საერთოდ თავი რომ დავანებოთ, ვთქვათ რომ ეს ტიპი საერთოდ არ გვჭირდება, ტექნიკური თვალსაზრისით საიტზე, სადაც ატვირთულია აღნიშნული ვიდეოები, მის დაბლოკვას რამდენიმე წუთი სჭირდება, რაც არ მოხდა. გამომდინარე აქედან, მიჩნდება გონივრული ეჭვი, რომ ვიღაცას აწყობდა ეს ვიდეოები გავრცელებულიყო და ამიტომ დევს 4 კვირის განმავლობაში"- განუცხადა "ნიუპოსტს" ლუკა ფეიქრიშვილმა.