იუსტიციის მინისტრის თეა წულუკიანის განცხადებით ვანო მერაბიშვილის ვადამდე გათავისუფლება არ იგეგმება და ამ საკითხზე ვერც სტრასბურგის სასამართლოს გადაწყვეტილევა ვერ იმოქმედებს. თეა წულუკიანი მიიჩნევს, რომ ვანო მერაბიშვილის საქმე არ არის განსაკუთრებული, ექსტრაორდინალური და ამიტომაც სტრასბურგის სასამართლოში საქმის ზეპირი განხილვა არ მოუთხოვია.

"ჩვენ არ ჩაგვითვლია, რომ ვანო მერაბიშვილის საქმე არის რაიმე არაჩვეულებრივი, ან ისეთი ექსტრაორდინალური, რომელიც მოითხოვდა ზეპირი განხილვის მოთხოვნას სტრასბურგში, ეს არის ერთი რიგითი პატიმრის რიგითი საჩივარი. ამიტომ, მე არ მომითხოვია ზეპირი განხილვა, ეს იქნებოდა რესურსის ზედმეტი ხარჯვა. ხვალ გამოდის გადაწყვეტილება. არ ვიცით, რა თქმა უნდა, წინასწარ, რა იქნება გადაწყვეტილებაში, მაგრამ რაც არ უნდა იყოს, ვანო მერაბიშვილი, როგორც სხვა პატიმრები, მისი პოლიტიკური გუნდიდან, რამდენიმე მათგანი ახლა უკვე აღარ არის, წინასწარ პატიმრობაში. ისინი იხდიან სასჯელს და კონკრეტულად, ბატონი ვანო მერაბიშვილის შემთხვევაში არ იგეგმება მისი ვადამდე ადრე გათავისუფლება. აქედან გამომდინარე, ამაზე ხვალინდელი გადაწყვეტილება, როგორიც არ უნდა იყოს ის, ვერ იმოქმედებს", - განაცხადა წულუკიანმა.

სტრასბურგის სასამართლო ვანო მერაბიშვილის საქმის შესახებ გადაწყვეტილებას 14 ივნისს გამოაქვეყნებს.