საჩხერეში ამერიკელმა კადეტებმა ზაფხულის საბაზისო კურსი დაასრულეს

პოლიტიკა - 17:52, 11 Jun, 2016

1719

პოლკოვნიკ ბესიკ ქუთათელაძის სახელობის საჩხერის სამთო მომზადების სკოლაში აშშ-ის რეზერვის ოფიცრის მომზადების კორპუსის 33-მა კადეტმა ზაფხულის საბაზისო კურსი დაასრულა. კურსის დახურვის საზეიმო ცერემონიალს საქართველოს თავდაცვის მინისტრის მოადგილე, ანა დოლიძე, საქართველოს შეიარაღებული ძალების გენერალური შტაბის უფროსი, გენერალ-მაიორი ვახტანგ კაპანაძე, წვრთნისა და სამხედრო განათლების სარდალი, პოლკოვნიკი მალხაზ მაკარაძე, პოლკოვნიკ ბესიკ ქუთათელაძის სახელობის საჩხერის სამთო მომზადების სკოლის მეთაური, მაიორი ივანე ცხადაძე, აშშ-ის რეზერვის ოფიცრის მომზადების კორპუსის კადეტების ხელმძღვანელი, ვიცე-პოლკოვნი უილიამ ფრუეტი და პრეზიდენტის ადმინისტრაციის აპარატის უფროსი გიორგი აბაშიშვილი დაესწრნენ.

კურსის დასრულებისადმი მიძღვნილ საზეიმო ცერემონიალზე კურსდამთავრებულებს შესაბამისი სერტიფიკატები და სამკერდე ნიშნები გადაეცათ. საბაზისო სამთო მომზადების კურსი 3 კვირის განმავლობაში მიმდინარეობდა. კურსის განმავლობაში ამერიკელმა კადეტებმა ქართველი ინსტრუქტორების დახმარებით სამთო-ტექნიკური უნარ-ჩვევები შეისწავლეს. მსმენელები მთაში გადაადგილების ხერხებს, სიმაღლიდან და კლდიდან დაშვებას, დაბრკოლებათა ზოლის მოწყობისა და გადალახვის ხერხებს, ასევე ექსტრემალურ პირობებში პირველადი დახმარების აღმოჩენას და ევაკუაციის ორგანიზების მეთოდებს დაეუფლნენ.

სწავლების დასრულების შემდეგ მსმენელებმა სპეციალური ტესტი ჩააბარეს. დაჯილდოების ცერემონიალის ბოლოს აშშ-ის რეზერვის ოფიცრის მომზადების კორპუსის კადეტების ხელმძღვანელმა, ვიცე-პოლკოვნიკმა უილიამ ფრუეტმა საჩხერის სამთო მომზადების სკოლის მეთაურს, ივანე ცხადაძეს მადლობის ნიშნად სამახსოვრო საჩუქარი გადასცა. საჩხერის სამთო მომზადების სკოლის მეთაურმა და სკოლის სერჟანტმა საჩუქრები წვრთნებისა და სამხედრო განათლების სარდლობისგანაც მიიღეს.