,,ჩვენ საქმეზე რეიტინგი მეტყველებს... ხალვაშს თუ როდესმე დისკომფორტი შეექმნა, ეს მისი პრობლემაა“

პოლიტიკა - 19:12, 10 Jun, 2016

1845

"რუსთავი 2"- ის საინფორმაციო სამსახურის უფროსი გიორგი ლაფერაშვილი "ნიუპოსტთან" საუბრისას ბიზნესმენ ქიბარ ხალვაშის განცხადებას გამოეხმაურა, რომლის მიხედვითაც "R2"-ის თანამშრომლების ძველ ისტორიას არ ექნება უარყოფითი ზეგავლენა მათ მომავალზე".

ლაფერაშვილის თქმით, რუსთავი 2 - ის გუნდი საკუთარ საქმეს კარგად აკეთებს და ამაზე საზოგადოების ნდობის ხარისხიც მეტყველებს.

"ქიბარ ხალვაშს ჩემთვის პირადად არაფერი შემოუთვლია, თუ მისი განცხადება ნიშნავდა იმას, რომ მუხლის ჩოქვით, სამი წრე უნდა დავარტყა, რომელიმე შენობას და მოვინანიო ჩემი წარსული ცოდვები, რომელიც თეორიულად შეიძლება გამაჩნდეს, მართალი გითხრათ, არ ვიცი რა ვუპასუხო. მე ვარ ის, ვინც ვარ, ვაკეთებ იმას, რასაც ვაკეთებ და ყველა ჩემს ხელმძღვანელს მათ შორის, თავის დროზე ქიბარ ხალვაშსაც არ შექმნია დისკომფორტი იმით, რასაც ვაკეთებ. თუ შეექმნა ეს დისკომფორტი, ეს მათი პრობლემა უფრო მგონია, ვიდრე ჩემი... რადგან ციფრები აჩვენებს თავისას, რადგან რეიტინგი იწერება, რადგან მაყურებელი ენდობა რუსთავი 2 -ს ესე იგი ჩვენ, ჟურნალისტები ჩვენს საქმეს კარგად ვაკეთებთ"- აღნიშნა ლაფერაშვილმა.

რუსთავი 2-ის საქმეზე სააპელაციო სასამართლომ პირველი ინსტანციის გაადწყვეტილება ძალაში დატოვა.

სამაუწყებლო კომპანიის ადვოკატები საქალაქო სასამართლოს მოსამართლის თამაზ ურთმელიძის მიერ 2015 წლის 3 ნოემბერს მიღებული გადაწყვეტილების გაუქმებას და საქმის პირველ ინსტანციაში დაბრუნებას ითხოვდნენ.

მოსამართლე თამაზ ურთმელიძემ საქმეზე, ქიბარ ხალვაში რუსთავი 2-ის წინააღმდეგ, გადაწყვეტილება 2015 წლის 3 ნოემბერს საქალაქო სასამართლოში გამოაცხადა. ურთმელიძემ ქიბარ ხალვაშის სარჩელი ნაწილობრივ დააკმაყოფილა. რუსთავი 2-ის წილის 60% მან ქიბარ ხალვაშს, 40% კი ხალვაშის კუთვნილ კომპანია "პანორამას" გადასცა.