ევროკავშირის შს და იუსტიციის მინისტრები საქართველოს პროგრესს აღიარებენ, თუმცა კონკრეტული გადაწყვეტილების მიღება ჯერ ვერ ხდება

პოლიტიკა - 17:08, 10 Jun, 2016

1080

ევროკავშირის წევრი ქვეყნების შინაგან საქმეთა და იუსტიციის მინისტრებს თურქეთის, საქართველოს უკრაინისა და კოსოვოსთვის ევროკავშირში მოგზაურობის უვიზო რეჟიმის დაწესებაზე განსხვავებული მოსაზრებები აქვთ, ქვეყნების უმრავლესობა უვიზო რეჟიმის შემოღებას, მისი შეჩერების მექანიზმის დაწესების შემდეგ ემხრობა.

გერმანიის შს სახელმწიფო მდივნის ემილი ჰაბერის განცხადებით ქვეყნებს უვიზო რეჟიმით სარგებლობის წესების მასობრივი დარღვევის შემთხვევაში ზომების ამოქმედება უნდა შეეძლოთ:

„ვიზალიბერალიზაცია ძალიან მნიშვნელოვანია საქართველოსთვის და მისი მოქალაქეებისთვის. ჩვენ განვიხილავთ საგანგებო მექანიზმის საკითხს იმისთვის, რომ ვიყოთ დარწმუნებულები, რომ უვიზო რეჟიმით სარგებლობის წესების მასობრივი დარღვევის შემთხვევაში შეგვეძლება ზომების ამოქმედება.“- განაცხადა ემილი ჰაბერმა.

გერმანელი კოლეგის მოსაზრებას იზიარებს შვედეთის შინაგან საქმეთა მინისტრი ანდრეს იგმანიც:

„თუ გვექნება სწორი სტანდარტები, ვფიქრობ გვექნება საქართველოსათვის ვიზალიბერალიზაცია. თუმცა მიმაჩნია, რომ ყველაფერი მექანიზმზეა დამოკიდებული“- აღნიშნა იგმანმა.

შვედეთის იუსტიციის მინისტრის მორგან იოჰანსონის განცხადებით, იმ 4 ქვეყანას შორის, რომელთა ვიზალიბერალიზაციაზეც ევროკავშირში მსჯელობა მიდის, კრიტერიუმები ყველაზე კარგად საქართველომ დააკმაყოფილა, თუმცა მინისტრი ვერ აკონკრეტებს დროს როდის მოხდება საქართველოსთვის უვიზო რეჟიმის შემოღება:

„საქართველომ ყველაზე მეტად დააკმაყოფილა კრიტერიუმები. ძალიან ძნელია და გამიჭირდება თქმა ზუსტად როდის მაგრამ მე საქართველოსთან დაკავშირებით ოპტიმისტურად ვარ განწყობილი“- განაცხადა მორგან იოჰანსონმა.