,,ეს ,,ტროიკა“ ასრულებდა ქვეყნის არაფორმალური მმართველის ნებას“

,,ეს ,,ტროიკა“ ასრულებდა ქვეყნის არაფორმალური მმართველის ნებას“ - შაშკინი რუსთავი 2-ზე

პოლიტიკა - 16:43, 10 Jun, 2016

3093

ტელეკომპანია რუსთავი 2-ის საქმეზე სააპელაციო სასამართლომ გადაწყვეტილება დღეს გამოაცხადა, რომლის მიხედვითაც პირველი ინსტანციის სასამართლოს მიერ მიღებული გადაწყვეტილება ძალაში დარჩა. „ნიუპოსტი“ აღნიშნულის შესაფასებლად დიმიტრი შაშკინს დაუკავშირდა, რომელიც მიიჩნევს, რომ სააპელაციო სასამართლომ გააგრძელა პირველი ინსტანციის სასამართლოს პოლიტიკა და ბიძინა ივანიშვილის გადაწყვეტილება გააჟღერა:

„ყველას კარგად გვესმოდა, რომ ეს განაჩენი დადგებოდა, რადგან სააპელაციო სასამართლომ გააგრძელა პირველი ინსტანციის პოლიტიკა, რომელიც ითვალისწინებს ქვეყნის ერთადერთი მმართველის გადაწყვეტილების შესრულებას. ქვეყნის არაფორმალურმა მმართველმა მიიღო გადაწყვეტილება, ახლა პირველი და მეორე ინსტანციის სასამართლოები, ნოტარიუსები ამ გადაწყვეტილებას აფორმებენ, ეს არის ძალიან მძიმე ნაბიჯი საქართველოს დემოკრატიული განვითარების ისტორიაში.

ხაზი მინდა გავუსვა იმ განცხადებას, რომელიც ამერიკის საელჩომ გააკეთა შეერთებული შტატების სახელით, რომელიც პირადპირი მესიჯი იყო, რომ ეს გადაწყვეტილება არ მიეღოთ, საუბარი იმაზე, რომ არჩევნებამდე ამას არ გავაკეთებთ, არაფერს კარგს არ მოიტანს ქვეყნისთვის პირველ რიგში და ეს ყველა მოქალაქემ უნდა გაითვალისწინოს. გარდა ამ პოლიტიკური ნაწილისა, იყო ერთი ტექნიკური ნაწილი, რომელიც ძალიან მნიშვნელოვანია. ამ „ტროიკიდან“ ერთ-ერთ მოსამართლეს არ ჰქონდა სპეციალიზაცია კონკრეტულად ამ საქმის წარმოების, ის იყო სისხლის სამართლის სპეციალისტი. ეს კიდევ ერთი მომეტი და ფაქტია, რომ სამივე მოსამართლე ასრულებდა ქვეყნის არაფორმალური მმართველის პოლიტიკურ ნებას“, - განაცხადა დიმიტრი შაშკინმა.