„რუსთავი2“-ის საქმესთან დაკავშირებით სააპელაციო სასამართლოს მიერ მიღებულ გადაწყვეტილებას ადამიანის უფლებათა დაცვის კომიტეტის თავმჯდომარე ეკა ბესელია გამოეხმაურა. ბესელიას თქმით ნორმალურია როდესაც სასამართლოს მიერ გადაწყვეტილების გამოტანის შემდეგ მოდავე მხარეებს შორის ერთი-ერთი უკმაყოფილოა, ამასთანავე საპარლამენტო უმრავლესობის წევრი სასამართლო გადაწყვეტილებაში ხელისუფლების ჩარევას გამორიცხავს და აცხადებს, რომ ხელისუფლების ინტერესშია არ მოხდეს ტელეკომპანია რუსთავი2-ის მენეჯმენტის და სარედაქციო პოლიტიკის ხელშეშლა:

„ჩვენ სასამართლოს ვერ მივუთითებთ რა გადაწყვეტილება უნდა მიიღოს. სასამართლო გადაწყვეტილების დროს ერთი მხარე ყოველთვის უკმაყოფილოა. თუ საქმე არ სრულდება მორიგებით, ასეთ შემთხვევაში ეს არის აბსოლუტურად ნორმალური, როდესაც მეორე მხარე უკმაყოფილოა სასამართლო გადაწყვეტილებით. ასეთ შემთხვევაში რა არის შემდეგი ეტაპი, ეს არის კიდევ ერთი ინსტანცია, რომელიც არსებობს საქართველოში, ეს არის უზენაესი სასამართლო. ეს ყველაფერი მიუთითებს იმაზე, რომ ხელისუფლების ინტერესშია თქვენი ტელეკომპანიის მენეჯმენტი, თქვენი ტელეკომპანიის სტრატეგია, ოპოზიციური განწყობა არ იყოს რაიმე ფორმით ხელშეშლილი და თუ ამისთვის რაიმე ტიპის გარანტიები იყო საჭირო და პირველ რიგში, ფინანსურ გარანტიებზე საუბრობდა ბიძინა ივანიშვილი, მან თქვა, რომ მზად იყო ამ ნაბიჯის გადასადგმელად“- განაცხადა ეკა ბესელიამ.