რუსთავი 2-ის საქმეზე სააპელაციო სასამართლომ პირველი ინსტანციის გაადწყვეტილება ძალაში დატოვა. სამაუწყებლო კომპანიის ადვოკატები საქალაქო სასამართლოს მოსამართლის თამაზ ურთმელიძის მიერ 2015 წლის 3 ნოემბერს მიღებული გადაწყვეტილების გაუქმებას და საქმის პირველ ინსტანციაში დაბრუნებას ითხოვდნენ.

„ნიუპოსტი“ გადაწყვეტილების შესაფასებლად ექსპერტ ნიკა ჩიტიძეს დაუკავშირდა. ჩიტიძე მიიჩნევს, რომ სასამართლოს მიერ მიღებულ გადაწყვეტილებაში ხელისუფლების გავლენა იგრძნობა:

„რაც შეეხება სააპელაციო სასამართლოს გადაწყვეტილებას, ჩვენთვის ცნობილია, რომ ამ გადაწყვეტილების გასაჩივრებას უზენაეს სასამართლოში აპირებენ, ჩანს, რომ ხელისუფლება ერევა სასამართლოს საქმიანობაში. თუმცა ის ფაქტი, რომ შეჩერებულია მმართველობის შესახებ ნორმა და აღსრულების ნორმა შესაბამისად, არსებული ხელმძღვანელობის პირობებში განაგრძობს ტელეკომპანია მუშაობას, გარკვეულწილად ემთხვევა ბიძინა ივანიშვილის განცხადებებს იმასთან დაკავშირებით, რომ მენეჯმენტი არ უნდა შეიცვალოს არჩევნებამდე. ხელისუფლების წარმომადგენლები აცხადებენ, რომ მათ ინტერესებში არ შედის მენეჯმენტის შეცვლა არჩევნებამდე“, - აღნიშნა ექსპერტმა „ნიუპოსტთან“ საუბრისას.

მისივე განცხადებით, სასამართლოს მიერ მიღებული გადაწყვეტილება ნეგატიურ გავლენას მოახდენს როგორც საქართველოს ვიზალიბერალიზაციის პროცესზე, ასევე ქვეყნის საერთაშორისო დემოკრატიულ საზოგადოებაში ინტეგრაციაზე:

„მე ვფიქრობ, რომ ეს ყველაფერი მოახდენს გავლენას არა მხოლოდ ვიზალიბერალიზაციის პროცესზე, არამედ საქართველოს საერთაშორისო დემოკრატიულ საზოგადოებაში ინტეგრაციის პროცესზე. პრობლემა ამაში მდგომარეობს, ეს მხოლოდ ვიზალიბერალიზაციას არ ეხება, ზეწოლა მასმედიის საშუალებებზე რა თქმა უნდა ნეგატიურად აისახება ქვეყანაში დემოკრატიის განვითარებაზე. აღნიშნულის შესახებ ამერიკის შეერთებული შტატების ელჩმაც გააკეთა განცხადება, ევროპის საბჭოს და ევროკავშირის რიგებშიც გაკეთდა მსგავსი განცხადებები“, - განაცხადა ნიკა ჩიტიძემ.