საქართველოსთვის ვიზალიბერალიზაციის პროცესი შეჩერდა

საქართველოსთვის ვიზალიბერალიზაციის პროცესი შეჩერდა - WSJ

პოლიტიკა - 12:34, 10 Jun, 2016

6872

"საქართველოსთვის, უკრაინისა და კოსოვოსთვის ვიზალიბერალიზაციის პროცესი შეჩერდა" - ამ სათაურით აქვეყნებს სტატიას გავლენიანი გამოცემა Wall Street Journal-ი . როგორც Wall Street Journal-ი წერს, საქართველოს, უკრაინისა და კოსოვოს მოლოდინი, რომ უვიზო რეჟიმს ზაფხულისთვის მიიღებდა, გაქრა იმ ახალი პრობლემების ფონზე, რომელიც ევროკავშირის ბლოკის უმსხვილესმა წევრებმა წამოჭრეს .
გამოცემის თანახმად, ბერლინის შეშფოთებას იწვევს გერმანიაში ქართული კრიმინალური დაჯგუფებები, საფრანგეთში კი მიიჩნევენ, რომ ტერორისტული საფრთხეების ფონზე, უვიზო რეჟიმი ქვეყნის უსაფრთხოების სისტემისთვის ახალ გამოწვევებს შექმნის.
როგორც WSJ ევროპელ დიპლომატებზე დაყრდნობით იტყობინება, ყველაზე ადრე ევროკავშირის საბჭომ და ევროპარლამენტმა საქართველოსთვის უვიზო მიმოსვლის რეჟიმი შეიძლება სექტემბერში მიიღონ.

Wall Street Journal-ის ჟურნალისტი მიიჩნევს, რომ ვიზალიბერალიზაციის გადადება შეასუსტებს საქართველში პროდასავლურ ძალებს, რომლებიც „მტრულად განწყობილ რუს მეზობელს ებრძვიან“.

გამოცემა საკუთარ წყაროებზე დაყრდნობით წერს, რომ გერმანიის ხელისუფლებამ 8 ივნისს მიმართა ევროკომისიას თხოვნით, წარადგინოს ანგარიში ქართველი კრიმინალების დანაშაულზე ევროკავშირის ტერიტორიაზე.
ევროკავშირის წევრი ქვეყნების შინაგან საქმეთა მინისტრები დღეს, ლუქსემბურგში, საქართველოსთვის სავიზო რეჟიმის გაუქმების საკითხს განიხილავენ. 20 ივნისს კი ვიზალიბერალიზაციის საკითხზე ევროკავშირის საგარეო საქმეთა მინისტრები იმსჯელებენ.

გუშინ, ევროკომისარმა გაფართოებისა და ევროპული სამეზობლო პოლიტიკის საკითხებში, იოჰანეს ჰანმა განაცხადა, რომ საქართველომ ვიზალიბერალიზაციის სამოქმედო გეგმა შეასრულა და ევროკავშირის სწრაფ გადაწყვეტილებას იმსახურებს.

გუშინვე, გამოცემა Euobserver-მა გაავრცელა ინფორმაცია, რომ ხუთი ევროპული ქვეყანა ბრიუსელს მოუწოდებს, მიანიჭოს საქართველოს უვიზო რეჟიმი ევროკავშირისადმი ნდობის შესანარჩუნებლად.

სააგენტოს ცნობით, ბულგარეთის, ესტონეთის, ლატვიის, ლიტვისა და რუმინეთის შინაგან და საგარეო საქმეთა მინისტრებმა ევროკავშირის საბჭოს თავმჯდომარე ქვეყანას - ნიდერლანდებს და ევროკავშირის საგარეო უწყებას ერთობლივი წერილით მიმართეს.

წერილში, ხუთი ქვეყნის წარმომადგენლები იმედს გამოთქვამენ, რომ საქართველოს ვიზალიბერალიზაციის საკითხზე შეთანხების მიღწევა პარასკევს, ლუქსემბურგში შინაგან საქმეთა მინისტრების შეხვედრაზე ან 20 ივნისს საგარეო საქმეთა მინისტრების შეხვედრაზე იქნება შესაძლებელი.