დავით უსუფაშვილმა ბუნდესტაგის თავდაცვის კომიტეტის თავმჯდომარესთან შეხვედრა გამართა

პოლიტიკა - 12:47, 10 Jun, 2016

1372

საქართველოს საპარლამენტო დელეგაცია, დავით უსუფაშვილის ხელმძღვანელობით,გერმანიის ფედერაციულ რესპუბლიკაში ვიზიტს განაგრძობს.

პარლამენტის თავმჯდომარემ და დელეგაციის წევრებმა შეხვედრა ბუნდესტაგის თავდაცვის კომიტეტის თავმჯდომარესთან, ვოლფგანგ ჰელმიხთან გამართეს.

მხარეებმა ორ ქვეყანას შორის თავდაცვის სფეროში ურთიერთობასა და თანამშრომლობის გაღრმავებაზე ისაუბრეს. როგორც საქართველოს პარლამენტის თავმჯდომარემ აღნიშნა, თავდაცვის სფეროში საქართველოსა და გერმანიას შორის მნიშვნელოვან შეთანხმებებს მოეწერა ხელი და იმედი გამოთქვა, რომ მჭიდრო ურთიერთობა მომავალშიც გაგრძელდება. მისივე განცხადებით, საქართველო მზად არის, გერმანიასთან გრძელვადიანი თანამშრომლობა გააგრძელოს.„ ჩვენი ქვეყანა მზად არის, გერმანიასთან ერთად, გრძელვადიან პრიორიტეტებზე ითანამშრომლოს იმ პირობით, რომ საქართველო არ დარჩება იმ შეთანხმებების მიღმა, რომელმაც მსოფლიოში უსაფრთხოება უნდა უზრუნველყოს“,- აღნიშნა დავით უსუფაშვილმა.

პარლამენტის თავმჯდომარის განცხადებით, საქართველოს სურვილია, აღიქმებოდეს როგორც ევროპისა და აზიის შემაკავშირებელი ადგილი, სადაც მყარდება კავშირები ეკონომიკის, სატრანსპორტო და ენერგეტიკის სფეროში, სადაც ცივილიზაციები შეჯახების ნაცვლად, ხვდებიან ერთმანეთს. „ჩვენ შეგვიძლია და გვსურს, რომ ვიყოთ სასარგებლო ამ ორი მხარისთვის - ევროპისთვის და აზიისთვის და არ მიგვიჩნიოს ვინმემ, როგორც პატარა პრობლემა, რომელიც ოდესღაც მოგვარდება“,- აღნიშნა დავით უსუფაშვილმა.

შეხვედრაზე რეგიონში არსებულ ვითარებაზე და მსოფლიოში ტერორიზმის საფრთხეზე ისაუბრეს. ბუნდესტაგის თავდაცვის კომიტეტის თავმჯდომარის განცხადებით, გერმანიას სურს, ნატო-სთან თანამშრომლობის ფორმატში, საქართველოს გამოცდილება გაუზიაროს. მისივე თქმით, საქართველოსთან უსაფრთხოების სფეროში თანამშრომლობა ჩვენი ქვეყნის თავდაცვისუნარიანობის ამაღლებას ისახავს მიზნად.“ ჩვენს ქვეყნებს შორის უსაფრთხოების სფეროში თანამშრომლობა ემსახურება მშვიდობას და არ უნდა აღიქმებოდეს საფრთხის შემცველად“,- განმარტა ვოლფგანგ ჰელმიხმა.