"რუსთავი2" მოსამართლე შორენა ყავლაშვილის აცილებას ითხოვს - "ის არის ზონდერ მოსამართლე და ხელს მოაწერს ნებისმიერ გადაწყვეტილებას"

პოლიტიკა - 18:23, 09 Jun, 2016

1828

„რუსთავი2“-ის გენერალური დირექტორის ნიკა გვარამიას განცხადებით რუსთავი 2-ის საქმის განმხილველი ერთ-ერთი მოსამართლე შორენა ყაველაშვილი სამოქალაქო დავების განხილვაში არაუფლებამოსილი იყო.

„ჩვენ საქმეს, რომელიც საკუთრივ სააპელაციო სასამართლომ დააკვალიფიცირა რთულ და კომპლექსურ სამართლებრივ დავად იხილავდა მოსამართლე, რომელსაც არ გააჩნია კვალიფიკაცია სამოქალაქო ან ზოგადი კვალიფიკაციის მიმართულებით. შესაბამისად ამ მოსამართლეს არც ერთი შეკითხვა არ გასჩენია მხარეების მიმართ, ხმა არ ამოუღია მთელ პროცესზე. ჩვენ გვაქვს ეჭვი, რომ ეს მოსამართლე სისხლის სამართლის პალატიდან მოვლენილი იქნა სწორედ იმიტომ, რომ დავალების შემსრულებელი მესამე მოსამართლე ყოფილიყო კოლეგიაში. ჩვენ ვსვამთ კითხვას რის საფუძველზე არ მონაწილეობდა დავაში ნაზღაიძე-გუჯაბიძის მყარი შემადგენლობის მესამე მოსამართლე ქეთევან მესხიშვილი ან ბატონი გოდერძიშვილი. რის საფუძველზე ჩანაცვლდა ეს მოსამართლეები ყაველაშვილით. რომელსაც არ გააჩნია სამოქალაქო დავებში მოსამართლის კვალიფიკაციის საბუთი. არგუმენტი, რომ მან გაიარა კურსები იუსტიციის უმაღლეს სკოლაში არის აბსურდი, რადგან ამ კურსებს გადის ყველა. მოსამართლის გამოცდები სპეციფიური კვალიფიკაციით ტარდება სწორედ იმის გამო რომ შემოწმდეს კვალიფიკაციები ამ მიმართულებებით და მუშაობის მიმართულებების პრიორიტეტები მიენიჭოს. მოსამართლე შორენა ყაველაშვილი რომელიც მოსამართლეობამდე იყო პროკურორი გამოცდილება აქვს მხოლოდ სისხლის სამართლის საქმეებში მუშაობის. კანონმდებლობით სასამართლოს აქვს უფლება მას მიანიჭოს სხვა მიმართულების საქმის განხილვა, მაგრამ ეს გამოიყენება იმ შემთხვევაში, როდესაც სასამართლო გადატვირთულია და ადგილი არ აქვს განსაკუთრებულად მნიშვნელოვანი საქმის განხილვას სადაც კოლეგიის ყველა წევრის აზრი უნდა იყოს განსაკუთრებულად კვალიფიციური და დასაბუთებული. ყაველაშვილს ამის კვალიფიკაცია არ აქვს და ის ამ საქმეში დავალების შემსრულებლად იქნა მივლენილი. ჩვენი ინფორმაციით ის არის პირადად სააპელაციო სასამართლოს თავმჯდომარის ვალერი ცერცვაძის ზონდერ მოსამართლე. იგი ასრულებდა პირადად მის დავალებას და ხელს მოაწერს ნებისმიერ გადაწყვეტილებას. შესაბამისად ჩვენ ვაყენებთ მოსამართლე ყაველაშვილის აცილების საკითხს, კეთილი ინებოს კოლეგიამ გამოვიდეს სათათბიროდან და გამოაცხადოს პირველ რიგში თავისი გადაწყვეტილება ამ საკითხთან დაკავშირებით. სააპელაციო სასამართლოს პასუხი არის არაკვალიფიციური და დაუსაბუთებელი. ჩვენ უკვე შეტანილი გვაქვს აცილების შუამდგომლობა და ველოდებით სასამართლოს პასუხს.“- განაცხადა ნიკა გვარამიამ.