პარტიებისთვის უფასო სარეკლამო დრო - ინტერპარტიული ჯგუფი პრეზიდენტს ვეტოს გამოყენებას სთავაზობს

პოლიტიკა - 13:01, 09 Jun, 2016

1324

საარჩევნო საკითხებზე მომუშავე ინტერპარტიული ჯგუფი პარტიებისთვის სარეკლამო დროის გადანაწილებასთან დაკავშირებით კანონპროექტზე პრეზიდენტისგან ვეტოს დადებას ითხოვს. ოპოზიცია აპროტესტებს იმ მუხლს, რომელიც განსაზღვრავს საარჩევნო სუბიექტებისთვის უფასო სარეკლამო დროს.

მათი თქმით, კოალიციიდან გამოყოფილი სუბიექტები იღებენ უფასო სარეკლამო დროს რაც არაკოსნტიტუციურია.

საქართველოს ეროვნულ-დემოკრატიული პარტიის ლიდერის ბაჩუკი ქარდავას განცხადებით "ხელისუფლება საკანონმდებლო მაქინაციების საშუალებით ცდილობს ხელისუფლების მოპოვებას".

"ჩვენ ბოლომდე შევეცდებით, რომ მოქმედ ხელისუფლებას ამ გზით ძალაუფლების შენარჩუნების საშუალება არ მივცეთ. ხელისუფლებამ თავხედური ნაბიჯები გადადგა როდესაც უმრავლესობიდან წასული სუბიექტების სასარგებლოდ გადადგა, მიიღო გადაწყვეტილება ცვლილებები შეიტანოს საარჩევნო სისტემაში და უფასო სარეკლამო დროსთან დაკავშირებით სხვა პოლიტიკური პარტიები ჩააყენოს არასათანადო მდგომარეობაში"- აღნიშნა ქარდავამ.

„ევროპელი დემოკრატების“ ლიდერის განცხადებით, პრეზიდენტის ვეტოთი მსოფლიო დაინახავს, როგორ ცდილობს ხელისუფლება ძალაუფლების მიტაცებას.

"ხელისუფლება ამას ღებულობს ისე როგორც მას აწყობს. თუნდაც უფასო საეთერო დრო გადანაწილდება მხოლოდ კოალიციაში შემავალი სუბიექტებზე. ჩვენ ვიმსჯელებთ მივმართოთ თუ არა პრეზიდენტს. გადალახავს თუ არა ამ ვეტოს ოცნება ამას გადამწყვეტი მნიშვნელობა არ აქვს, აქ საუბარია პრინციპზე. რომ ნახოს მთელმა მსოფლიომ, როგორ აპირებს ხელისუფლება ძალაუფლება"- აღნიშნა პაატა დავითაიამ.

"დემოკრატიული მოძრაობის” წევრი გიორგი ახვლედიანი კი ხელისუფლებას "კრიმინალური აქტის გამოცემაში ადანაშაულებს".

"მსგავსი საარჩევნო სისტემის შესახებ ცვლილებების მეორე მოსმენით დამტკიცება კრიმინალური აქტის გამოცემაა. ისინი სხვას ართმევენ უფასო სარეკლამო დროს და საკუთარ თავზე ინაწილებენ. ეს არის კონსტიტუციის დარღვევა და ამას ხელისუფლება უნდა ხედავდეს"- აღნიშნა ახვლედიანმა.

მისი თქმით, ე.წ გერმანული საარჩევნო მოდელი აღარ განხორციელდება.

"გერმანული მოდელი ხელისუფლებისთვის კატასტროფაა და ამიტომ უფასო სარეკლამო დროის სანაცვლოდ მოხდა გარიგება"- აღნიშნა ოპოზიციის წევრმა.