დღეს გავრცელებულ ინფორმაციას იმასთან დაკავშირებით, რომ ბოტანიკურ ბაღში ჰესის მშენებლობა იგეგმება, თბილისის მერი არ ადასტურებს და „ნაციონალური მოძრაობის“ მიერ გავრცელებულ განცხადებას სიცრუეს უწოდებს.

ოპოზიციამ დღეს დოკუმენტაცია გაასაჯაროვა, რომლიდანაც, მათი განმარტებით, ირკვევა რომ პარკის ტერიტორიაზე ჰიდროელექტროსადგური უნდა აიგოს. მემორანდუმი 2015 წელს ენერგეტიკის სამინისტროსა და შ.პ.ს წავკისის ჰესს შორის გაფორმდა.

აღნიშნულ საკითხზე დღეს კომენტარი ჟურნალისტებთან საუბრისას გარემოსა და ბუნებრივი რესურსების დაცვის მინისტრმა გიგლა აგულაშვილმაც გააკეთა და განაცხადა , რომ „ეს ფანტაზიის ნაყოფია“:

"ვფიქრობ ეს არის ფანტაზიის ნაყოფი, ოღონდ მთლად ნიჭიერი ფანტაზია არ უნდა იყოს. არ ვფლობ ინფორმაციას და არ ვფიქრობ, რომ ჰიდროელექტროსადგური უნდა აშენდეს იქ. ბოტანიკურ ბაღში ჰიდროელექტრო სადგურის, კოსმოდრომის ან რაიმე მსგავსი დიდი ინფრასტრუქტურის მშენებლობის თაობაზე ჩემთვის ცნობილი არაფერია“ - განაცხადა აგულაშვილმა.