ამერიკის სენატის საგარეო ურთიერთობათა კომიტეტის სხდომაზე ძირითადი განსახილველი თემები იყო რუსეთის აგრესია რეგიონში, ასევე საზღვრისა და ხელშეკრულებების დარღვევა. სხდომაზე მომხსენებელად სახელმწიფო მდივნის მოადგილე იყო მიწვეული.

ვიქტორია ნულანდის განცხადებით, შეერთებული შტატები ამ თანამშრომლობაში განსაკუთრებულ ყურადღებას საქართველოს თავდაცვისუნარიანობის გაძლიერებას დაუთმობს.

სხდომაზე განცხადება გააკეთა აშშ-ს თავდაცვის მდივნის მოადგილემაც. მაიკლ კარპენტერის განცხადებით, აშშ იზიარებს განსაზღვრებას, რომ რუსეთს ოკუპირებული აქვს საქართველოს 20 პროცენტი და განაგრძობს ქვეყნის ტერიტორიების ოკუპირებას. კარპენტერმა ასევე აღნიშნა, რომ აშშ აქტიურად მუშაობს საქართველოსთან თავდაცვიუნარიანობის ამაღლების კუთხით:

„სრულად ვეთანხმები თქვენს განსაზღვრებას, რომ რუსეთი აგრძელებს სხვადასხვა გზით ზეწოლას საქართველოზე, ოკუპირებული აქვს საქართველოს ტერიტორიების 20 პროცენტი, აფხაზეთი და სამხრეთ ოსეთი, ეს მოსახლეობის მნიშვნელოვანი ნაწილია და ასევე რუსეთი აგრძელებს ადმინისტრაციული საზღვრის გადმოწევას სამხრეთ ოსეთის რეგიონში საქართველოს ტერიტორიის უფრო მეტ ნაწილზე, რუსეთი სხვა მხრივაც ახდენს ზეწოლას საქართველოზე, მათ შორის სამხრეთ ოსეთის დე-ფაქტო ლიდერის მიერ სურვილის გამოცხადებით რეფერენდუმის ჩატარებაზე რუსეთში ინტეგრირებისთვის.

2008 წელს საქართველოში რუსეთის შემოჭრის შემდეგ ჩვენი მიზანია, შევქმნათ რუსეთის მიმართ გამძლეობა და შევამციროთ დაუცველობა. კრიზისის შემდეგ დავხარჯეთ 480 მილიონი საქართველოს უსაფრთხოების დახმარებაზე, ბევრი ჩვენი ტრენინგის პროგრამა, ბოლო ათწლეულში ფოკუსირებული იყო ქართველი ძალების მომზადებაზე და საზღვარგარეთ განსათავსებლად, მათ შორის ერაყში, მოგვიანებით კი ავღანეთში, ახლა ჩვენ ვაპირებთ მეტი ყურადღება დავუთმოთ ქართული ძალის გაწვრთნის ძალისხმევას, თავდაცვისუნარიანობის გაძლიერებისთვის“, - განაცხადა მაიკლ კარპენტერმა.